Akeanon news: Aklan may nagakaigo nga "commodities"

Akeanon news: Aklan may nagakaigo nga "commodities"

Tuesday 27th of March 2012

KALIBO, Aklan, Marso 27 (PIA6) -- Ro probinsya it Aklan hay may nagakaigo nga supply it “commodities” samtang ro mga presyo kara hay base man sa Suggested Retail Price (SRP), suno sa Department of Trade and Industry (DTI).

Sa ginhiwat nga meeting kurundaya eamang it Provincial Local Price Coordinating Council (PLPCC) sa GRQG Memorial Building, si DTI-Aklan Provincial Director Diosdado P. Cadena, Jr. hay nagpasayud man nga base sa andang pag-monitor nga ginhiwat ku Marso 12, nakit-an nanda nga owa it pagbag-o sa mga presyo it mga “basic necessities” ukon mga nagapanguna nga kinahangeanon sa baeay sa mga supermarket ag grocery stores sa Kalibo.

Ginsugid ni Cadena nga nag monitor sanda it mga presyo it mga baeakeunon ag ro kaabuon kara sa napueo (10) nga mga grocery ag supermakert sa Kalibo ag lima (5) nga stalls sa Kalibo Wet Market.

Sa preyo it “prime commodities”, na notaran it DTI nga ro Safeguard nga sabon eamang ro nagdugang sa presyo. Ro 90 g. nga sabon nga nagabalor dati it P24.00 kat gin monitor ku Pebrero 21 hay mabakae eon sa presyo nga P25.65 halin it Marso 12, ukon nagdugang it P1.65 samtang ro ana kara nga 135 g. nga dati hay P33.50, hay P35.50 eon makaron, ukon nagdugang it P2.00 kada bar.

Sa wet market, ro lata it 300 ml nga Alaska Condensed Milk hay mabakae eon makaron sa presyo nga P37.50, nga dati hay ginabaligya it P35.10.

Ro presyo man it 60 g nga Safeguard sa wet market hay nagdugang – halin sa P15.00 ku Pebrero 21, raya hay mabakae eon it P16.00.

Ginhambae it DTI nga ro pagdugang sa presyo it Alaska hay bangud sa mahae man nga pagkumpra sa sangka supermarket iya, samtang ro pagtaas it presyo it Safeguard hay bangud sa adjustment nga ginhimo it grocery base sa bag-o nga SRP ku Pebrero 23, 2012.

Sa nasambit man nga report, ginsugid man it DTI nga owa it gintaas sa presyo it mga construction ag electrical materials sa Kalibo sa kamana nga tiyempo it pag monitor. (JSC/VGV-PIA 6 Aklan)

Cabatuan.com - Kasimanwa.com - Diosdado Cadena Jr.