Akeanon news: Presyo it asukar, mantika ag sibuyas, nagnaba sa Aklan

Friday, March 18, 2011

Akeanon news: Presyo it asukar, mantika ag sibuyas, nagnaba sa Aklan

by Venus G. Villanueva

KALIBO, Aklan, Mar 18 (PIA) Mabahoe ro gin naba sa presyo it asukar, mantika ag sibuyas sa mga mayor nga tindahan sa Aklan, suno sa Office of the Provincial Agriculturist (OPA) iya.

Sa ginhiwat nga primero nga meeting para sa dag-on it Provincial Local Price Coordinating Council (PLPCC) sa Conference Room it GRQG Memorial Building ku Marso 17, ginsugid ni Moises Inamac it OPA-Aklan nga ro puti nga asukar, nga mabakae dati sa presyo nga P66.00 kada kilo hay mabakae eon makaron sa presyo nga P62-hasta P63.00 kada kilo, samtang ro brown nga asukar, nga dati hay ginbaligya sa presyo nga P52-P54.00 ro kilo hay mabakae eon makaron sa P45.00kada kilo.

Ginsugid ni Inamac nga naglibot ro OPA ku Marso 15 sa pagtan-aw ku mga presyo it baeakeon sa mga tindahan.

Nagnaba man ro presyo it mantika. Halin sa P32.00 kada bote nga nakaandan sa tindahan, ginabaligya eon ra makaron sa P30.00 kada bote.

Ginsugid man it OPA nga nagnaba man ro presyo it sibuyas. Halin sa P160.00 kada kilo ku nagtaliwan nga buean, mabakae eon makaron ro sang kilo sa P60.00.

Ro makangawa-ngawa nga pagnaba it presyo it sibuyas hay posible nga bangud sa ginapatigayon makaron nga tiyempo it pag ani it sibuyas, suno sa mga miyembro it konseho. Ro sibuyas hay nagahalin sa probinsya it Mindoro.

Ro iba pa gid nga produkto agrikultura nga nakita nga nagnaba ro presyo hay ro mga hiligutmon pareho ku balingka ag kamote, tinuea pareho ku maragoso ag taeong, ag iba pa nga cash crops.

Samtang, 11 nga mga establismento sa Aklan ro nakit-an it Department of Trade and Industry (DTI) iya nga nagabaligya it mga produkto nga sobra sa gintaeana nga Suggested Retain Price (SRP).

Suno kay DTI-Aklan Provincial Director Diosdado P. Cadena Jr., nakit-an nanda ra kat naglibot sanda ku Marso 10 sa 4 nga wet market stores, 4 nga grocery stores and 8 nga hardware stores sa pagpatigayon it One-Day Special

Price Monitoring.

Sa wet market sa Kalibo, ro mga basic necessities ag prime commodities nga nakit-an nga ginabaligya it mahae ku sa SRP hay mga delata nga sardinas, sabon nga pangeaba, corned beef, eanggaw, ag patis sa gin bottle.

Sa mga grocery stores ag supermarkets, ro hakit-an nga ginabaligya it sobra sa SRP hay ro luncheon meat ag meat loaf.

Bangud kara, ro DTI-Aklan hay nag tao sa rayang 11 nga mga establismento it Show Cause Orders, agud magsabat ro mga tag-ana kon ham-an mataas ro pagbaligya nanda it mga produkto.

Gin monitor man it DTI ro construction supplies ag harina, ugaling hay owa man it SRP nga gintao para kara.

Ro PLPCC, nga gina kumpunihan it nagkaeain-eain nga ahensya nasyonal ag probinsyal nga mga upisina ag grupo it mga konsumidor nga may mandu nga magtan-aw sa presyo it mga nagapanguna nga mga baeakeunon pareho ku mga produkto sa agrikultura, mga produktong dunang manggad, bueong ag mga gin proseso nga mga produkto hay ginapamunuan ni Governor Carlito S. Marquez bilang chairman ag DTI-Aklan Provincial Director Diosdado P. Cadena, Jr. (JSC/VGV-PIA6 Aklan)

Cabatuan.com - Kasimanwa.com - Diosdado Cadena Jr.