Aklanon News: Consumer Month magasentro sa nagakaigo ag masarangan nga pagkaon

Sunday, October 02, 2011

Aklanon News: Consumer Month magasentro sa nagakaigo ag masarangan nga pagkaon

ni Venus G. Villanueva KALIBO, Aklan, October 2 (PIA) -- Ro sang buean nga pagselebrar makaron nga dag-on it Consumer Welfare Month hay magasentro sa pagsiguro nga may nagakaigo nga masarangan nga pagkaon para sa tanan.

Raya hay bangud sa selebrasyon makaron nga dag-on, ro Department of Agriculture ro magapanguna kara, kon siin ro tema hay "Sapat, Ligtas at Abot-Kayang Pagkain Para Sa Lahat."

Ro pagselebrar it Consumer Welfare Month, suno kay Department of Trade and Industry (DTI) Aklan Provincial Director Diosdado P. Cadena hay base sa Presidential Proclamation No. 1098 nga ginpaguwa ku Setyembre 26, 1997, ag kon siin ro mga ahensya hay nagabueos-bueos it pagpanguna sa selebrasyon kada dag-on suno sa pagpili it National Consumer Affairs Council (NCAC).

Ginsugid ni Cadena nga pilang beses eon man nga nakapanguna ro DTI sa pagselebrar it Consumer Welfar Month.

Sa parte it DTI, may mga aktibidades eon nga nakalinyada ro ahensya sa pagsaueog kara, pareho ku pagbitay it mga "streamers", pag monitor it sari-saring produkto kapin pa ro para sa paskwa, ag pag monitor man it mga presyo it baeakeon.

Magahiwat man ro DTI it pagpaabot it sari-saring mga informasyon paagi sa radyo ag magahiwat man it Forum on Consumerism ag paghanas may kaangtanan sa nagakaangay nga pag resolbar it mga problema sa tunga it konsumidor ag establismento.

Ro Forum on Consumerism hay pagahiwaton sa Oktubre 12 sa ACP Centrepoint sa Kalibo, Aklan kon siin ro mga partisipante kar hay rong mga konsumidor nga naghalin sa sari-saring mga sector.

Pagahiwaton man ro paghanas sa husto nga pagresolbar it mga reklamo it konsumidor sa mga establismento agud sa lugar lang mimo eagi hay ma solbar eon ro mga reklamo ag indi eon magbuhay pa. (JCM/VGV PIA 6 AKLAN)

Cabatuan.com - Kasimanwa.com - Diosdado Cadena Jr.