Aklanon News: Mga pinasahi nga produkto it Aklan mapatunga sa Expo 2012

Friday, December 30, 2011

Aklanon News: Mga pinasahi nga produkto it Aklan mapatunga sa Expo 2012

ni Venus G. Villanueva

KALIBO, Aklan, Dis. 30 (PIA) -- Uman nga magapatunga ro mga pinasahi ag tumaeagsahon nga mga produkto it Aklan sa pagahiwaton nga Kalibo Ati-atihan Products Expo 2012 sa Pastrana Park sa Enero 9 hasta 16.

Tuyo it products expo nga ipakita sa publiko ag mga bisita ro mga produkto it Aklan, nga nangin regular eon nga atraksyon kada Ati-atihan sa Kalibo dag-on dag-on.

Igapakita sa expo ro mga bag-ong disensyo it mga produkto halin sa abaka, piņa, ag mga gamit sa baeay ag pang regalo nga himo sa paperl, bariw, nito, botong ag kahoy.

Igabaligya man ro mga gin proseso nga mga pagkaon ag iba pang mga produkto nga may kaangtanan sa turismo.

Suno kay Diosdado P. Cadena, Jr., Provincial Director it Department of Trade and Industry (DTI), ro pagpakita ngara it mga produckto it Aklan hay nagatuyo man nga paeaparon ro oportunidad it mga Micro, Small and Medium Enterprises (MSMEs) it probinsya.

Beinte-otso (28) nga mga MSMEs ro maga entra sa makaron nga product expo.

Ro aktibidad hay sangka pagbueuligan it DTI-Aklan, Hugod Aklanon Producers Association, Inc. ag gobyerno municipal it Kalibo paagi sa Kalibo Sto. Nino Ati-atihan Foundation, Inc. (KASAFI). (DTI/JSC/VGV-PIA 6 Aklan)

Cabatuan.com - Kasimanwa.com - Diosdado Cadena Jr.