Aklanon news: Aklan maga marka it ika 14 nga Pina and Fiber Festival

Aklanon news: Aklan maga marka it ika 14 nga Pina and Fiber Festival

By Venus G. Villanueva, Monday 22nd of April 2013

KALIBO, Aklan, Abril 22 (PIA) -- Ro Aklan Pina and Fiber Festival, nga imaw rong nagapasundayag it mga “premium indigenous” nga produkto it probinsya hay naga marka it anang ika 14 anyos sa dag-on ngara.

Pareho ku unang paglunsar kara, rayang aktibidad hay ginahiwat makaron bilang sambilog sa mga mayor nga mga atraksyon it Aklan Day Celebration kada Abril 25.

Ro Aklan Pina and Fiber Festival hay pagahiwaton sa Trade Hall sa Provincial Capitol Grounds, suno kay Provincial Director Diosdado P. Cadena, Jr. it Department of Trade and Industry (DTI) ag magabuhay it sang dominggo halin it April 22-30 sa alas 9:00 it agahon hasta alas 8:00 it gabii.

May 33 nga mga Small and Medium Enterprises (SMEs) nga maga-entra sa trade show halin sa sari-saring sector: indigenous fibers and crafts, mga pang regalo, gamit sa baeay ag pang dekorar, mga ga proseso it pagkaon ag sa ikamayad it eawas.

Ginsugid ni Cadena nga may mga bag-ong konsepto ag disensyo it mga produkto ro igalunsar sa exhibit sa dag-on ngara nga magatao it eain nga presentasyon sa mga naga-eksister nga mga produkto.

Gindugang pa gid nana nga maga sentro ro trade show sa mga lokal nga produkto sa idaeum it mga ginapaboran nga mga sector pareho ku mga indigenous fibers, mga pangregalo, gamit sa baeay, muebles ag mga ginproseso nga agri-aqua nga mga pagkaon.

Pila pa gid nga mga aktibidades nga pagahiwaton kadungan sa trade fair ag sa ika 57 anyos nga pagselebrar it Aklan Day hay rong Accessories Fashion Show sa Abril 24, Investment Conference cum Market Encounter sa Abril 30 nga pagatambungan ni DTI Secretary Gregory Domingo; Abaca Crafts and Weaving Demonstration halin it Abril 22-30 Special Products Exhibition (Abaca and Bamboo) sa Abril 22-30.

Ginapangunahan ro paghiwat it Pina and Fiber Festival it DTI-Aklan sa pakipagbuligan sa Hugod Aklanon Producers Association, Inc., Aklan Pina and other Indigenous Fibers Manufacturers and Traders Association, Inc., Gobyerno Probinsyal it Aklan, Congressional District Office, Fiber Industry Development Authority ag Philippine Exporters Confederation, Inc. (JSC/VGV/DTI-PIA6 Aklan)

Cabatuan.com - Kasimanwa.com - Diosdado Cadena Jr.