Aklanon news: Aklan nagaselebrar it IT Week

Aklanon news: Aklan nagaselebrar it IT Week

By Venus G. Villanueva, Friday 16th of November 2012

KALIBO, Aklan, Nob 16 (PIA6) -- Ginapatigayon makaron ro mga serye it mga aktibidades sa Aklan sa pagselebrar sa pinaka-unang kahigayunan it Information Technology (IT) Week halin it Nobyembre 15 hasta 16.

Ginpangunahan ro selebrasyon it Department of Trade and Industry (DTI) kaibahan ro bag-o eang ha-organisar nga Kalibo-Aklan Information Technology Enablers (KAITE), nga gina komponihan it mga lideres/representante halin sa mga kolehiyo sa Aklan nga nagatanyag it kurso nga Information Technology, sektor sa negosyo ag mga ahensya it gobyerno sa probinsya.

Ro kauna-unahang president it KAITE hay si Noli Resterio it Aklan Catholic College (ACC).

Sa anang mensahe sa pangbukas nga programa nga ginhiwat sa APSTA Center ku Nobyembre 15, ginpasaeamatan ni Engr. Diosdado P. Cadena Jr., Provincial Director it DTI-Aklan ro presensya it sektor it IT paagi sa mga establisimiento sa nasyon nga nangin pangatlo sa pinakamabahoe nga sektor nga nagatao it trabaho sa mga Pilipino nga nagabulig it mabahoe sa Gross National Product (GNP) it nasyon.

Ginhambae ni Cadena nga mabahoe gid ro oportunidad sa IT, ag mabahoe gid ro pagpasaeamat it DTI sa mga katuwang kara pareho ku mga estudyante ag mga manugturo sa mga eskuylahan sa Aklan nga may kurso nga IT.

Ginpaabot man ni Cadena ro pagsalig nga bangud sa pag-umpisa it pagselebrar it IT sa Aklan, abu pa gid nga mga positibo nga bagay nga maabot sa Aklan pareho ku pagtukod mismo it mga establisimiento sa Aklan agud ro mga mayad nga mga inunga hay indi eon magpanaw sa ibang lugar agud mag-usoy it trabaho.

Sa parte mat-a ni Governor Carlito Marquez nga nagpa-abot man it mensahe, ginhambae nana ro mga bentaha it modern nga teknolohiya sa impormasyon, nga naging mabahoe nga bulig sa pagpadaeagan it panggobyerno sa probinsya.

Gindayaw man nana ro DTI ag ro mga kolehiyo sa Aklan nga may kurso sa IT sa pag-organisar it KAITE nga ginaeauman nana nga makabulig it mabahoe sa Aklan.

Pagkatapos it anang mensahe, ginpasumpa nana ro mga opisyales ag Board of Directors it KAITE.

Ginsundan ro programa it sangka Jobs Fair for BPO Recruitment it TRANSCOM ag Teletech.

Ro pila pang mga aktibidades sa paghiwat it IT Week iya hay rong Alternative Classes it mga estudyante ag mga nagaturo sa IT paagi sa SMART ag DepEd, ag inter-school competition sa hardware servicing, digital arts, web page design ag quiz bowl sa Nobyembre 16 sa Learning Resource Center it Kalibo Pilot Elementary School. (JSC/VGV-PIA6 Aklan)

Cabatuan.com - Kasimanwa.com - Diosdado Cadena Jr.