Aklanon news: DTI nagaduso it istriktong sueondanon sa pagbaligya it petrolyo

Aklanon news: DTI nagaduso it istriktong sueondanon sa pagbaligya it petrolyo

By Venus G. Villanueva, Tuesday 2nd of October 2012

KALIBO, Aklan, Oktubre 2 (PIA6) -- Ginrekomendar kurundaya eamang it Department of Trade and Industry (DTI) ro mapag-on nga pag implementar it mga sueondanon para sa mga establisimiento sa Kalibo sa pagbaligya it gasolina ag iba.

Gintao rayang rekomendasyon it DTI paagi kay Provincial Director Diosdado P. Cadena Jr. sa sangka Committee on Energy hearing nga ginhiwat it konseho it Kalibo sa pagtaeakay sa ordinansa nga ginpasar ni Hon. Ariel Fernandez.

Suno kay Cadena, bukon eamang dapat nga iduso ro pagbutang it mga senyales sa mga baealigyaan it gasoline ag iba pareho ku pagpaeong it cellphone mientras gapakarga it gasoline ag pagpatay it makina kon gapagasolina kundi nga tan-awon man dapat kon ro establisimiento hay naga-kaangay nga may kaiping nga iba pang mga negosyo.

Ro pilang mga bukon it kaangay, suno kay Cadena, hay rong mga bars, mga convenient stores ag iba pa nga kon mangin kaiping hay basi makatao it piligro sa mga pumueuyo ukon bumaeakae.

Ginpabakod rayang pagduso ni Cadena sa pagpapag-on it mga sueondanon it sangka ginkangay man it komitiba nga empleyado it sangka gasolinahan sa Kalibo nga nagpahayag sa konseho nga importante gid nga paeungon ro cellphone ag indi anay mag text agud makalikaw sa sunog ukon pageupok.

Sa parte it Municipal Planning and Development Office (MPDO) nga ginapamunuan ni Engr. Marlo Villanueva, ginhambae nana nga mga istrikto man nga mga sueundanon nga ginapatuman ro banwa pag-abot sa pagkonsiderar it ginatawag nga “compatibility” it mga establisimiento, ugaling hay may mga naga-apply man para sa “deviation” ag naga apelar sa Local Zoning Board of Adjustment and Appeal (LZBAA) ag raya hay ginatan-aw man it mayad. (JSC/VGV-PIA 6 Aklan)


Diosdado Cadena Jr.