Aklanon news: DTI nagpanawagan sa mga Aklanon nga ipa sertipika ro andang 'helmet'

Aklanon news: DTI nagpanawagan sa mga Aklanon nga ipa sertipika ro andang 'helmet'

By Venus G. Villanueva, Friday 3rd of August 2012

KALIBO, Aklan (PIA6) -- Nagpanawagan kurundaya eamang ro Department of Trade and Industry (DTI) sa mga Aklanon nga ipa sertipika ro andang mga helmet kon raya hay una sa listahan it “standard protective helmet”.

Raya hay sa pagsunod sa ginapatuman nga Republic Act 10054 it Department of Transportation and Communication (DOTC) nga tanan nga naga motor hay dapat mag gamit it “standard protective helmets” bisan pa nga ginpaisoe kara ro implementasyon sa Enero 2013 imbes nga sa Setyembre it rayang dag-on.

Ginhambae ni Cadena nga indi eon dapat maghueat ro mga Aklanon it "deadline" sa pag proseso ku andang mga aplikasyon agud indi sanda mag ginutok sa upisina it DTI.

Gindugang pa gid nana nga dapat hay mamentaha ro mga Aklanon nga ipatan-aw kon "standard" ro andang mga helmet eagi ay libre pa ro pag proseso hasta sa Setyembre.

Ro panawagan ngara nga ginpaabot man ni Cadena sa ginhiwat nga meeting it Provincial Local Price Coordination Council (PLPCC) kurundaya eamang sa GRQG Memorial Building kon siin ginsugid man nana bilang kaparte ku a report nga sa makaron, may 200 kada adlaw nga ginaproseso sanda nga aplikasyon para sa helmet.

Halin ku Hulyo 6 hasta it Agusto 1 it rayang dag-on, ginsugid ni Cadena nga naka proseso ro DTI it 2,317 nga mga aplikasyon ag naka tapik it 2,267 nga mga Import Commodity Clearance (ICC) nga mga sticker.

May hapaguwa ro DTI nga 5,997 nga application forms, samtang 4,400 ro personal nga nag adto sa upisina.

Singkwenta (50) kara, suno kay Cadena, hay owa gid maaprobahan bangud ro mga helmet nanda hay owa sa listahan it aprobado nga brand, owa it marka ro mga helmet, may mga kueang nga parte ro helmet ukon eupi, samad ag pinintahan nga indi makita ro brand.

Sa 60 nga sertipikado nga brand, 59 kara ro himo sa ibang nasyon samtang sambilog gid lang ro obra sa Pilipinas.

Ro listahan hay halin sa Bureau of Public Standards, DTI NCR ag DTI Cebu. (JSC/VGV-PIA 6 Aklan)

Cabatuan.com - Kasimanwa.com - Diosdado Cadena Jr.