Aklanon news: Daywang 'Pioneer MSMEs' sa Aklan ginpadunggan

Aklanon news: Daywang 'Pioneer MSMEs' sa Aklan ginpadunggan

By Venus G. Villanueva, Thursday 19th of July 2012

KALIBO, Aklan (PIA6) -- Daywang mga pinakauna nga "entrepreneurs" sa Aklan ro ginpadunggan ku Hulyo 18 bangud sa andang pag-umpisa it industriya sa paghaboe it Pina nga tela sa Aklan imaw man ro pagsustinir kara, ag ro pagpaeapnaag it paggamit it abaca ag raffia kon siin raya ro nagtao it daean nga mangin sambilog sa pina-kauna nga nangin "export" it probinsya.

Ro daywang ginpadunggan, nga imaw sanday Susima M. Dela Cruz it Dela Cruz House of Pina ag Josefina Dela Cruz it JIC Enterprises ro nagbaton ku andang pagpasidungog sa pangbukas nga programa it tatlong adlaw nga Aklan Enhanced SME Caravan nga ginhiwat sa Ati-Atihan Festival Hostel and Conference Center sa Kalibo.

Si Susima Dela Cruz, nga naga edad eon it 87 anyos nga taga New Buswang, Kalibo hay ginpasidunggan it Provincial, Micro, Small and Medium Enterprise Development Council (PSMEDC) ag Department of Trade and Industry (DTI) bilang pinaka una nga entrepreneur sa Aklan nga nagpaumwad ag magpakilaea it hinaboe nga Puro nga Pina nga tela ag sa ana man nga padayon nga pag-amot sa pagpa-improbar ag pagpaeapnaag it industriya sa paghaboe sa probinsya.

Samtang, si Josefina I. Dela Cruz, nga makaron hay naga edad it 95 anyos ag ap-at (4) nga buean, hay ginpasidunggan man bilang pinakauna nga ‘exporter’ sa Aklan it abaca ag raffia nga "placemat", nga gin-umpisahan nana ku 1957 hasta it 1985 ag nag-ungkat eamang kat imaw hay nagtinir sa Canada.

Si Leila Sualog, nga sangka retirado nga empleyada it gobyerno probinsyal it Aklan hay gintaw-an man it pagpadungog bangud imaw ro pinaka-una nga PMSMEDC Coordinator.

Ro PMSMED Council hay gina kompohihan it mga miyembro halin sa mga ahensya it gobyerno ag pribado nga sektor nga gin-organisar pa ku 1996.

Raya ro pinaka-una nga gin-organisar nga konseho sa bilog nga Bisayas Nakatundan paagi sa pagtinguha it DTI-Aklan ag gobyerno probinsyal it Aklan.

Nagapungko bilang Chairperson kara ro gobyerno probinsyal paagi ron kay Governor Carlito S. Marquez samtang si Engr. Diosdado P. Cadena, Jr. ro co-chairman kara.

Sa pangbukas nga programa ku Hulyo 18, presente sanday Governor Marquez ag Director Cadena kon siin nagpanawagan sanda nga pabaskugon pa gid ro mga SMEs sa Aklan agud makabulig sa pag-improbar it ekonomiya sa Aklan.

Euwas sa Entrepreneur’s Forum sa primerong adlaw, ro iba pa gid nga aktibidad sa tatlong adlaw nga SME Caravan hay rong Seminar on Effective Trade Center/SME Showroom Management and Visual Merchandising sa Hulyo 19, ag Consultancy on Food Packaging and Labeling, Skills Demonstration on Advanced Beadworks ag Seminar on Wealth Management sa Hulyo 20. (JSC/VGV-PIA 6 Aklan)

Cabatuan.com - Kasimanwa.com - Diosdado Cadena Jr.