Aklanon news: Kalibo Ati-atihan Product Showcase pagahiwaton

Aklanon news: Kalibo Ati-atihan Product Showcase pagahiwaton

By Venus G. Villanueva, Tuesday 8th of January 2013

KALIBO, Aklan , Enero 8(PIA6) -- Ro Kalibo Ati-atihan Product Showcase sa makaron nga dag-on hay magapakita ag magabaligya it mga produktong bag-o ro disenyo.

Rayang mga produkto, suno sa Department of Trade and Industry (DTI) sa probinsya hay paga kumpunihan it mga himo sa abaca, piña, raffia ag mga pang regalo ag ika suksok nga igabaligysa sa pagbukas it product showcase sa Kalibo Pastrana Park sa Enero 14.

Ro Product Showcase hay ginahiwat kada ikatlong dominggo it Enero bilang sambilog sa mga mayor nga aktibidades it Kalibo Sto. Niño Ati-Atihan Festival.

Tuyo kara nga ikapakita sa publiko eabi gid sa mga bisita ro mga hinimuan nga produkto sa Aklan agud mabuligan ro mga Small ag Medium Enterprises (SMEs) iya.

Suno kay DTI-Aklan Provincial Director Diosdado P. Cadena, Jr., ro product showcase hay ginakabuligan it DTI, Hugod Aklanon Producers Association ag banwa municipal it Kalibo paagi sa Kalibo Sto. Niño Ati-atihan Festival Inc. ukon KASAFI.

Igabaligya man ro mga sikat nga mga gin proseso nga produkto it Aklan nga agri-aqua, imaw man ro mga pang-“pasalubong” nga mga baligya.

Ginahiwat ro Kalibo Sto. Niño Ati-atihan Festival kada ikatlong dominggo it Enero nga sa makaron hay mahueog sa Enero 14 hasta 20 kon siin ro mga mayor kara nga mga hiliwaton hay ro sangdominggo nga pagsadsad sa mga karsadahon it Kailbo, novena, paeapak, Ati-atihan Nights sa Magsaysay Park, misa sa plaza sa kaadlawan ag pag prusisyon. (JSC/VGV-PIA6 Aklan)

Cabatuan.com - Kasimanwa.com - Diosdado Cadena Jr.