Aklanon news: Kooperatiba sa Aklan paga ayudahan it DTI

Aklanon news: Kooperatiba sa Aklan paga ayudahan it DTI

By Venus G. Villanueva

Tuesday 23rd of April 2013

KALIBO, Aklan, April 23 (PIA) -- Sangka kooperatiba iya sa Aklan nga imbolbado sa paghaboe it tela nga piña ro hapilian it Department of Trade and Industry (DTI) nga kwalipikado nga katuwang sa proyekto nga Shared Service Facilities (SSF) sa idaeum ku “Big Push” nga programa para sa Small and Medium Enterprises (SMEs) sa probinsya.

Ro SSF, suno kay Provincial Director Diosdado P. Cadena, Jr., hay sangka Public Private Partnership (PPP) nga inisyatibo nga iga implementar paagi sa sangka katuwang halin sa pribado nga sektor nga makatao it mga masaligan nga mga pasilidades nga mabutangan it mga kagamitan.

Sa idaeum ku rayang programa, ro Handicraft of Aklan, nga imaw rong hapilian nga kooperatiba, hay pagataw-an it 50 nga mga handlooms para sa mga resipyente sa banwa it Kalibo, Lezo ag Makato.

Ro Kalibo, kapital nga banwa it Aklan nga imaw man ro kapital sa paghaboe hay magabaton it 13 nga handlooms nga igatao sa Barangay New Buswang ag Old Buswang; Lezo, 17, nga igatao sa Barangay Poblacion ag Barangay Ibao, ag Makato, paagi sa Barangay Tina nga may 20 nga handlooms nga pagabatunon.

Ginpili ro HAMPCO it DTI bangud makatao ra it nagakaangay nga pasilidad nga mabutangan it mga makinarya.

Tuyo it SSF nga pamayad-ayaron ro mga gina prayoridad nga industriya paagi sa paggamit it mga dekalidad nga mga makinarya ag magtuga it mga nagapanguna nga industriya sa pagsuporta sa National Industry Cluster Capacity Enhancement Program (NICCEP).

Ginapanan-aw nga paagi sa proyekto ngara, ro mga SMEs sa pinakapobre nga 609 nga mga banwa sa nasyon hay mabenefisyuhan.

Ro SSF, suno sa DTI, hay igalunsar sa Abril 30 sa paghiwat it Aklan Investment Conference (ICON) 2013, nga pagatambungan ni DTI Secretary Gregory Domingo ag iba pang mga opisyales.

Gin-establisar ro HAMPCO ku Disyembre 27, 1989 ag sa makaron hay may 385 nga mga miyembro kon siin 141 kara ro mga nagahaboe, naga burda, nagatahi, nagapinta ag iba pa.

Ro anang mayor nga produkto kara hay abaka silk, abaca piña, abaca basket weave, piña cloth, piña seda shawl ag piña seda barong.

Ro mga baealigyaan kara hay lokal ag sa guwa – Boracay, Manila, Cebu, Pampanga, Palawan ag Japan, France ag Italy. (JSC/VGV-PIA6 Aklan)

Cabatuan.com - Kasimanwa.com - Diosdado Cadena Jr.