Aklanon news:
Mga SMEs it Aklan, maga entra sa product exposition


Aklanon news: Mga SMEs it Aklan, maga entra sa product exposition

By Venus G. Villanueva, Saturday 22nd of September 2012

KALIBO, Aklan, Set 22 (PIA6) -- Igapasundayag it 28 nga mga Small and Medium Enterprises (SMEs) it Aklan ro andang pinakabag-o nga mga produktong inugsuksok pareho ku pina ag abaca nga mga blusa ag iba pa sa pagahiwaton nga Aklan Product Exposition sa Oktubre 22 hasta 28 sa The Event Center sa SM City Iloilo.

Rayang hiliwaton, nga pagapamunuan it Department of Trade and Industry (DTI), Hugod Aklanon Producers Association, Inc. ag Gobyerno Probinsyal it Aklan sa pagpakigbuligan sa Philexport Aklan Chapter, hay mangin oportunidad man agud ikapakita ro mga ginpanami pa gid nga mga tabon sa lamesa, mga maintok nga bag, mga gamit sa baeay nga himo sa botong ag nito, suno kay DTI-Aklan Provincial Director Diosdado P. Cadena, Jr.

May mga ginproseso man nga mga pagkaon pareho ku karne ag produkto it panaderia nga igabaligya.

Kaabuan sa mga SMEs nga maga entra sa exposition hay mga katapu it Philexport.

Rayang dag-unan nga ginahiwat nga Aklan Product Exposition hay sambilog sa mga aktibidades nga ginahueat-hueat it mga SMEs it Aklan agud ikapakita nanda ro andang mga produkto ag makabuoe it mga kliyente sa Iloilo ag sa iba pang lugar sa rehiyon, hambae ni Cadena. (JCM/VGV PIA 6 Aklan)

Cabatuan.com - Kasimanwa.com - Diosdado Cadena Jr.