DepEd, OSCI pasidunggan mga outstanding Ilonggo nga estudyante

DepEd, OSCI pasidunggan mga outstanding Ilonggo nga estudyante

By Lilibeth A. French; Wednesday 6th of March 2013

SYUDAD SANG ILOILO, March 6 (PIA) -- Kabilugan nga 20 ka mga manugradwar nga estudyante sa elementarya kag sekondarya sa syudad kag probinsya sang Iloilo ang pagapasidunggan sa isa ka seremonya pagahiwaton sa St. Joseph School, Diversion Road, Iloilo City sa Marso 15.

Ang nahinambitan nga mga estudyante ang sa karon nga tuig nga tagdaug sa Search for the Ten Outstanding Elementary School Pupils (TOESP) kag Ten Outstanding Secondary School Students (TOSSS) sang Iloilo para sa academic year 2012 – 2013 nga ginapatigayon sang Outstanding Student Circle of Iloilo.

Si Aubrey Beatrice Carnaje sang SPED-Integrated School for Exceptional Children nga nagpangibabaw sa ranking ang magapanguna sa mga awardees sa TOESP.

Ang iban pa nga TOESP awardees amo sanday: Nancy Nicole T. Supena sang Sto. Domingo Elementary School; Ma. Samantha Ysabel L. Co sang Ateneo de Iloilo – SMCS; Fergie John O. Frange sang Central Philippine University; Heather Angelique Parangan sang West Visayas State University; Rose Mae L. Andresio sang Sta. Barbara Central Elementary School; Dominic S. Yap sang PAREF Westbridge School, Inc.; Leif Mathieu T. Tobias sang Cabatuan Central Elementary School; Eunice Lyn F. Salistre sang Solomon Integrated School de Iloilo; kag Daryl John A. Libiano sang Cabatuan Parochial School.

Pangunahan naman ni Blessed Bea T. Plondaya sang Saint Joseph School (Iloilo) ang napulo ka mga awardees sa sekondarya nga ginalakipan nanday Kevin Friedrich Y Chan sang Iloilo Scholastic Academy; Alyssa Jude M. Montalban sang Cabatuan National Comprehensive High School; Jose Roy E. Santos, Jr. sang Central Philippine University; Kelly A. Binder sang University of San Agustin; Nizza Ann E. Regalado sang Ateneo de Iloilo – SMCS; Mary Clarence G.. Madero sang Pavia National High School; Caryl Joanne A. Nonato sang SPED – Integrated School for Exceptional Children; Bianca Patrice S. Syching sang Iloilo Central Commercial HS; kag Jovie Anne R. Cabangal sang Barotac Viejo National High School.

Si OSCI Chairman Henry Caspe nagsiling nga kabilugan nga 28 ka mga estudyante sa elementarya kag 33 sa sekondarya ang gin-nominar sa sini nga tuig nga paindis-indis nga ginapatigayon sa koordinasyon sang Departmento sang Edukasyon sa Iloilo.

Pagkatapos sang written examination sang Enero 23, ang mga finalist nag-atubang sa panel sang dungganon nga hurado para sa isa ka hinun-anon sang nagligad nga Pebrero 13.

Pinaagi sining tuigan nga kahiwatan, ang OSCI nagatuyo pasidunggan ang mga outstanding nga hinimuan sang mga estudyante indi lamang sa ila academic performance apang sa ila buluthuan kag kumonidad.

Ang mga tagdaug magabaton sang medalya kag plake samtang ang ila mga coach kag buluthuan magabaton sang sertipiko. (JSC/LAF-PIA6)

Cabatuan.com - Timeline 2013