Prez kang Cabatuan Airport Transport Assoc. nagtambong sa DOT MOA signing Hiligaynon News: DOT ginpangunahan ang MOA para sa pagpaayo sang "tourism front liners" By Vicente W. Villavert, Wednesday 15th of February 2012 SYUDAD SANG ILOILO, Pebrero 15 (PIA 6) -- Ang mga drivers ang ginakabig nga mga “front liners” sa industriya sang turismo kabangdanan sang pagpirmahanay sang isa ka Memorandum of Agreement (MOA) sa pagpanguna sa Department of Tourism (DOT) Region 6 kaupod sa tatlo pa ka iban nga mga ahensya sang gobyerno para mapabaskug ang sektor sang transportasyon sa pagsanyog sang turismo sa Western Visayas. Ginpahayag ni DOT 6 OIC-Regional Director Helen J. Catalbas nga ang DOT, Land Transportation Office (LTO), Land Transportation Franchising and Regulatory Board (LTFRB), kag ang Civil Aviation Authority of the Philippines nagakabagay gid nga mag-updanay sa pagtrabaho kon paano magmangin makagalanyat ang Western Visayas sa mga turista bilang isa ka lugar nga kon sa diin may kasegurohan ang ila seguridad sa sini nga bahin sang pungsod. Ginpabutyag man ni LTO Director Gerard M. Camina nga ang mga “taxi drivers kag iban pa nga mga tourist land transport operators ginakabig nga mga tourism frontliners, bangud kay ang aton mga bisita ang una nila nga maatubang kag makasugilanon, kag daku nga bahin sang mga impresyon sang aton mga bisita ang magadepende sa sahi sang inter-aksyon nga ila ma-eksperyensyahan sa sektor sang transportasyon”. Hambal ni Camina nga kon ang aton mga bisita “satisfied” sa ila nga inter-aksyon sa mga drivers, “ila madala pauli ang maayo nga halandumon. Ang obserbasyon sang mga bisita sa ila pagkari diri ila nga igatu-ad kag ipalapnag pa gid sa ila natungdan nga mga pamilya, kaabyanan kag mga himata kon sila na ang magbalalik sa ila natungdan nga ginhalinan nga mga lugar”. Ang MOA nagasaad para sa maayo nga koordinasyon sa nahinambitan nga mga ahensya sa pagpatigayon sang trainings bahin sa Security and Safety, Grooming and Basic Tour Guiding sa tanan nga lisensyado nga mga taxi kag tourist land transport operators/drivers nga naga operate sa Western Visayas; mangin co-signatories sang Certificate of Training/Identification Card nga iga isyu sa tanan nga mga tourist land transport/taxi drivers nga makakumpleto sa pagtambong sa training; istrikto nga pagpatuman sang penalidad sa salawayon nga mga tourist land transport/taxi operators/ drivers santo sa nasaad sa mando sang tagsa ka natungdan nga mga partido. Ang MOA nagrekomendar man sang pagpatigayon sang compulsory drug testing sa tanan nga mga tourist land transport/taxi drivers operating in Western Visayas. Kaupod ni Catalbas sa pagpirma sang kasugtanan amo sanday Area Manager Efren N. Nagrama sang CAAP; LTO Director Gerard M. Camina kag LTFRB Director Romulo V. Bernardes. Nagtambong man sa MOA signing ceremony sa DOT Regional Office si Engr. Perfecto Yap, Presidente sang Association of Taxi Operators-Iloilo City. Si Yap presidente man sang New Iloilo Airport Transport Association.(JSC/VWV-PIA6 Iloilo) (Bookmark this page for future reference) CABATUAN INTERNATIONAL AIRPORT Cabatuan.com - Timeline 2012 Cabatuan.com