Hiligaynon News: DSWD magapatigayon sang asembliya para sa pagpasangkad sang Pantawid Pamilya

PIA Press Release Tuesday, January 03, 2012

Hiligaynon News: DSWD magapatigayon sang asembliya para sa pagpasangkad sang Pantawid Pamilya

ni Lilibeth A. French

SYUDAD SANG ILOILO, Enero 3 (PIA6) -- Ang Department of Social Welfare and Development 6 magapatigayon sang community assemblies sini nga bulan sang Enero sa apat ka mga lokal nga panguluhan sa probinsya sang Iloilo nga nalakip sa pagpasangkad sang programa Pantawid Pamilyang Pilipino Program, isa sa mga mayor nga istratehiya sang gobyerno sa pagpahaganhagan sang kaimolon kag pagpatigayon sang kasanyugan sosyal.

Ang mga munisipyo sang Pototan, New Lucena, Zarraga kag Dumangas ang nalakip sa 11 ka mga bag-o nga lugar nga nasakup sa Set 5 implementation sang Pantawid Pamilya sa probinsya. Ang iban pa nga mga bag-o nga lugar amo ang Badiangan, Barotac Nuevo, Cabatuan, Estancia, Mina, Tigbauan, kag Dingle.

Ang pagpasangkad naga-target sang kapin sa 21,425 ka mga potential household beneficiaries sa mga bag-o nga lugar kalakip ang 167 ka mga puluy-an sa banwa sang Concepcion sa diin gina-implementar na ang Pantawid Pamilya.

Sa 11 ka mga bag-o nga lugar para sa Set 5, ang Estancia ang may pinakadaku nga bahin sa mga potential beneficiaries nga may 3,011, ginasundan sang Pototan nga may 2,827; Dumangas nga may 2,642; Tigbauan nga may 2,576; Barotac Nuevo nga may 2,338; Dingle nga may 2,023; Cabatuan nga may 1,953; Badiangan nga may 1,240; Mina nga may 1,000; Zarraga nga may 935; kag New Lucena nga may 713.

Ang datos nga nakuha sa DSWD 6 nagapakita nga may 62,733 ka mga puluy-an sa 27 ka mga lokal nga panguluhan sa probinsya ang nabuligan na sa Set 1 tubtub 4 nga implementasyon sang programa nga suno kay Pangulong Benigno Aquino III, kon sa diin magluwas nga inisyal nga sabat sa kinahanglanon sang mga imol ang isa man ka pamaagi agud mapat-ud ang palaabuton sang tanan nga mga Filipino.

Ginsiling ni DSWD 6 Pantawid Pamilya Program Information Officer Alma Joronadal nga ang impormasyon natuhoy sa mga potensyal nga benepisyaryo nga mga puluy-an ang pamatud-an pinaagi sa community assemblies.

Sa idalum sang programa Pantawid Pamilya, ang mga imol nga benepisyaryo nga puluy-an ang mahimo makakuha sang cash grants kon ila matuman ang mga gintalana nga mga kondisyon para sa ikaayong-lawas, nutrisyon kag edukasyon sang mga kabataan nga nagapangidaron 0 tubtub 14 anyos.

Tubtub sang Disyembre 15, 2011, ang datos sang DSWD nagapakita nga humalin sang 2009 may kabilugan na nga P497, 218, 500 ang nahatag sa mga benepisyaryo sa probinsya pinaagi sa over the counter ukon cash card. (JSC/LAF-PIA6 Iloilo)

Cabatuan.com - Timeline 2012