Hiligaynon News: Outstanding Ilonggos, institusyon ginpasidunggan

Hiligaynon News: Outstanding Ilonggos, institusyon ginpasidunggan

By Lilibeth A. French, Sunday 15th of April 2012

SYUDAD SANG ILOILO, Abril 15 (PIA) -- Anum ka mga Ilonggos ang ginpasidunggan sa ila outstanding nga hinimuan kag kontribusyon sa probinsya sang Iloilo sa isa ka testimonial luncheon nga ginhiwat sa lobby sang kapitolyo probinsyal, Abril 13.

Magluwas sa mga indibidwal nga achievers, tatlo ka lokal nga panguluhan, isa ka institusyon kag kooperatiba nga nagdala man sang nasyonal nga kadungganan sa probinsya ang ginhatagan sang “Bugal sang Iloilo” award sini nga tuig.

Ang mga “Bugal sang Iloilo” individual awardees amo sanday Haydee Pasuelo, Jelyn Duting, MSgt. Billy Benebile, PO2 Rina Salaya, 2nd Lt. Tom Puertollano, kag Denver Cuello.

Si Pasuelo nga nagikan sa banwa sang Calinog ang anay Audit Team Leader sang gobyerno probinsyal ang ginhingadlan nga Most Outstanding Employee sang Commission on Audit samtang si Jelyn Duting, ang postman nga na-assign sa Banate Iloilo Post Office ang Dangal ng Bayan awardee sang Civil Service Commission.

Sanday Benebile kag Salaya ang mga tagbaton naman sang award nagikan sa Metrobank Foundation. Si Benebile nga taga-Balasan isa sa Ten Oustanding Philippine Soldiers sang 2011 kag si Salaya sang Maasin ang napilian man isa sa mga Outstanding Policemen sa pungsod sang nagligad man nga tuig.

Samtang si Puertollano nga ang mga ginikanan nagikan sa banwa sang Lambunao kag Tigbauan amo ang valedictorian sang 2012 Bagwis Class sang Philippine Military Academy.

Ang bugal naman sang Cabatuan nga si Cuello ang ginkilala sa iya hinimuan sa patag sang sports nga amo sa karon ang World Boxing Council Minimum weight champion.

Ang mga LGU awardees amo ang masunod: Alimodian bilang Galing Pook Awardee para sa 2011; Guimbal bilang Best Municipal Disaster Risk Reduction and Management Council sang Gawad Kalasag sang NDRRMC; kag New Lucena, tagbaton sang Special Award sa 2011 Apolinario Mabini Awards para sa iya sini bug-os nga kooperasyon sa pag-adoptar sang mga PWD Friendly Facilities.

Ginkilala man ang Cabasi-Sta. Rosa Elementary School tagbaton sang Best Education Institution Advocating DRRM sa Gawad Kalasag kag ang Dingle Government Workers Development Cooperative sa pagdaug sang Most Outstanding Cooperative sa kategoriya sang Non-Agri-Based sa 2011 Pinakatanging Kooperatiba or the Gawad Pitak sang Land Bank of the Philippines.

Sa iya pagpamulong-pulong, gihatagan pagtamod ni Gobernador Arthur Defensor ang kaimportansiya sang paghatag pasidungog sa mga dalayawon nga hinimuan bangud ining mga pagkilala amo ang nagatulod sa tawo nga mag-excel sa kabuhi.

Ang tanan nga awardees nagbaton sang three-dimensional Arroyo Fountain inspired trophies sa kahiwatan nga kabahin namin sang 111th founding anniversary sang probinsiya nga gintawag “Semana sang Iloilo".

Ang beinte ka mga iskolar sang gobyerno probinsiyal nga naggradwar sini nga tuig ang nagtambong man kag nagbaton sang P1,000 kada isa. Ang apat nga naggradwar Magna Cum Laude nagbaton sang P5,000 kag ang duha ka two cum laudes nagbaton sang P3,000 kada isa.

Ginkilala man sa tion sang kahiwatan ang 35 ka mga empleyado sang gobyerno probinsyal nga nagretiro sa serbisyo. Sila ang nagbaton sang sertipiko kag relo nga Timex nga may logo sang Iloilo Provincial Capitol. (JSC/LAF-PIA6)

Cabatuan.com - Timeline 2012