Flying Eye Hospital nag-abot sa Cabatuan Airport Hiligaynon News: Pagsalbar sang mata pinaagi sa operasyon ginsuguran sa Iloilo Cabatuan, Iloilo, Philippines By Vicente W. Villavert, Friday 24th of February 2012 SYUDAD SANG ILOILO, Pebrero 24 (PIA 6) -- Ang mga pumoluyo sang Western Visayas nga may diperensya ukon may balati-an sa mata ang direkta nga makabenepisyo sa ginapatigayon nga sight-saving surgeries ukon operasyon sa balatian sa mata nga ginahimo sang sang FedEx kag ORBIS International sa Flying Eye Hospital sa Iloilo Airport bilang kabahin sang pangkalibutanon nga inisyatibo sa pag tapna sa pwede malikawan nga pagkabulag. Sa ginhiwat nga opening program sa Iloilo Airport, ginpabutyag ni Governor Arthur Defensor nga ang program makahatag kahigayunan sa mga imol nga makabenepisyo nga masalbar kag mapabalik ang ila maayo nga kahimtangan sang ila mata, kag iya ginadayaw ang guban nga nagapatigayon sini nga hilikuton bangud “ang inyo nahimo magapabilin sa tagipusuon kag pagadumdumon gid sang lubos sang mga tao nga nakabaton sang sini nga bulig. Suno kay Dr. Jose Mari C. Fermin, Medical Center Chief sang Western Visayas Medical Center, may kadamuon nga 10 ka tao ang nagapa opera sang ila mga mata sa ila hospital adlaw-adlaw, apang nagpahayag siya sang kasubo bangud “indi tayuyon ang ini nga sitwasyon bangud sa kakulang sang ila pundo para sa sini nga bahin sang ikaayong-lawas”. Hambal ni Fermin nga tatlo tubtub lima ka tao sa tagsa ka 50 ka tao sa Western Visayas ang nagakabulag. “Ang pag-abot sang ORBIS isa ka daku nga bulig sa aton bangud sang ila state-of-the-art facilities kag sa mga trainings nga ila pagapatigayunon para sa aton mga doctors ukon mga local eye care providers,” hambal ni Fermin. Ginpabutyag ni Flying Eye Hospital Medical Director Dr. Carlos Solarte nga ang eye care program napatigayon na sa 89 ka mga pungsod kag nakapaayo sang sobra sa 15 million blind and visually impaired persons, pinaagi sa Flying Eye Hospital. Ang Flying Eye Hospital isa ka converted DC-10 aircraft kag naga-isahanon sa bilog nga kalibutan nga ophthalmic surgical and training hospital nga may pakpak. “Ang Orbis isa ka organization nga nagatib-ong sang pagpaayo kag tayuyon (sustainable) nga pagtatap sa mata sa mga lugar nga amon nakadtuan kag pinaagi man sa paghanas kag pagtudlo sa mga natungdan nga sektor katulad sa mga ophthalmologists, nurses, anaesthesiologists, biomedical engineers kag kutob sa sa tao nga nagahatag proper eye care kag promotion sang eye health,” hambal ni Solarte. Ginkalipay man ni Dr. Josefina Salazar-Yap, Presidente sang Philippine Academy of Ophthalmology-Western Visayas Chapter, nga ang mga “technical expertise nga ila matun-an sa sini nga pinsahi nga kahigayunan makahatag gid bulig sa mga eye patients diri sa Western Visayas”. Sa sulod sang duha ka semana sa Iloilo, sa pakig partnership sa Western Visayas Medical Center, ang ORBIS medical team magapatigayon sang intensive skills exchange program para sa mga eye care professionals kag maga pang-opera sa mata sang mga pre-screened patients nga nagaantos sa ila problema sa mata. Sa ikatatlo nga semana, ang ORBIS magapalapanag sang ila pagpanghanas sa Hospital-Based Program sa Bacolod, katuwang ang Corazon Locasin Montelibano Memorial Regional Hospital. Suno sa press report sang Orbis kag FedEx press, sa 7,107 islands sang Pilipinas, may kadamuon nga 100 million ka tao, nga kon sa diin sobra sa 600,000 ang nabulag. Ang Pilipinas nagahatag sang first rate ophthalmic expertise and care, subong man sang advanced private care para sa mga may ikasarang sa kabuhi. Nasaad man sa ila press report nga pigado ang makuha nga ophthalmic care sang mga nagapuyo sa mga kaprobinsyahan. Suno sa pahayag ni Dr. Solarte sa opening program nga ang ORBIS kag FedEx may yara programa sa Pilipinas—sa Manila, Davao, Subic Bay kag Cebu kag “nalipay kag bugal namon nga ginasaulog ang amon 30 years of sight-saving work sa Philippines kag ang Orbis Flying Hospital yari diri sa Iloilo, kag ang ini nga ophthalmic program nahauna nga napatigayon sa Western Visayas. Si Rhicke Jennings, FedEx Express managing director for the Philippines and Indonesia, nagsiling nga “bilang nagapanguna nga aviation sponsor sa sulod sang tatlo ka dekada, ang FedEx padayon nga nagasuporta sa sight-saving programs sang ORBIS sa bilog nga kalibutan, pinaagi sa amon lapnagon nga global network kag aviation expertise. Ang ini nga programa sini nga tuig sa Western Visayas region nagahatag sa FedEx sang oportunidad sa pagbulig sa ORBIS nga madul-ong ang long-term kag sustainable solutions para sa pwede malikawan nga pagkabulag sa mga pumoluyo sang Pilipinas.(JSC/VWV-PIA 6 Iloilo) (Bookmark this page for future reference) CABATUAN INTERNATIONAL AIRPORT Cabatuan.com - Timeline 2012 Cabatuan.com