Hiligaynon news: Automatic Rain Gauges ginpahamtang sa Iloilo

PIA Press Release Friday, January 06, 2012

Hiligaynon news: Automatic Rain Gauges ginpahamtang sa Iloilo

ni Elsa S. Subong

SYUDAD SANG ILOILO, Enero 6 (PIA) -- Lima ka Automatic Rain Gauges (ARGs) ang ginpahamtang sa mga pili nga banwa sang Iloilo – Alimodian, Cabatuan, Maasin, Pavia kag sa distrito sang Jaro, syudad sang Iloilo.

Ini nga proyekto buylog nga ginpatigayun sang Department of Science and Technology (DOST) kag sang Smart Communications, bilang paagi sa pagtakus sang kadamuon sang ulan kag sang kadugayun sini.

Ginsiling ni DOST-6 Director Rowen Gelonga nga ang ARGs nga gindugang sa mga napahamtang na sa iban nga bahin sang rehiyon, bahin sang isa ka sistema nga magahatag benepisyo sa Iloilo kag sa pungsod, sa patag sang pagpanghanda para sa kalamidad.

Dugan pa ni Gelonga nga paagi sa Smart SIM card, ang kasangkapan magapadala sang impormasyon bahin sa pagtulo sang ulan agud mabanabana sa tagsa ka kinse minutos.

“Ini nagapadasig kag nagahimu nga labi nga sibu ang nagligad nga pamaagi sa pagtakus paagi sa lipak kag pagpadala sang impormasyon tagsa 24 ka oras,” ang siling ni Gelonga.

“Ginapa-abot man naton nga sa pagligad sang panahon, makatipon pa gid kita sang dugang nga impormasyon kag makahimo sang mas maayo nga pagpaangut sa tunga sang pag-ulan kag pagbaha,” dugang pa ni Gelonga.

Ginsiling man ni Gelonga sang damlag lang sa tunga sang pagpanalakay ni Bagyo "Sendong", nga ang laban sang mga kabuhi nga nadula indi bangud sa mabaskug nga hangin kondi bangud sa pagbaha.

Si Gelonga nagsiling nga ang Smart nagpangaku man sa pagbulig hatag pundo para sa pagpahamtang sang Automatic Water Level Sensors nga maga- alerto sang mga komunidad sa tiniOn nga magalab-ot ang tubig sa makatalagam nga lebel.

“Ang mga ARGs upod sa iban pa nga mga kasangkapan, dugangan pa sang water level sensors nga igapahamtang sa bug-os nga rehiyon, ang mga pangulohan-lokal mangin mas handa sa ano man nga malain nga panahon,” si Gelonga nagsiling.

Sa pihak nga bahin, ginsiling ni Ramon Isberto, pinuno sang Smart Public Affairs, nga iya ginapamatud-an liwat ang tinutoyu sang Smart sa pagbulig sa mga institusyon sang gobyerno kag sang pangulohan-lokal sa tinion sang kalamidad.

“Wala labot sa pagpaseguro sang nagapadaoun nga serbisyo sa komunikasyun sa panahun sang kalamidad, nagapaninguha man kami sa pagtukib gamit ang amon teknolohiya sa pagbulig sa pangulohan agud mapaayu pa gid ang aton sistema sa pagbantay sang dalagan sang panahon, sa tanan nga posible nga pamaagi,” dugang pa ni Isberto. (JSC/ESS-PIA6 Iloilo)

Cabatuan.com - Timeline 2012