Hiligaynon news: DOT ginapanan-aw ang masanag nga palaabuton sang turismo sa WVisayas

Hiligaynon news: DOT ginapanan-aw ang masanag nga palaabuton sang turismo sa WVisayas

By Leonard T. Pineda I, Wednesday 9th of January 2013

SYUDAD SANG ILOILO, Ene. 9 (PIA6) --- Mangin masanag ang palaabuton sang industriya sang turismo sa Western Visayas sini nga tuig 2013.

Suno kay Department of Tourism 6 (DOT-6) Regional Director Atty. Helen Catalbas, may mga pat-ud nga indikasyon ang mga hitabo sining karon lamang nga maga pauswag pa guid ang turismo diri sa rehiyon.

Suno sa iya, maayo ang pagpahanugot sang gobyerno sang China nga mapadayon ang pag-abot sang mga turista halin sa amo nga pungsod kay ang rehiyon VI isa sa ila mayor nga mga kaladtuan.

Sa pagbukas sang Iloilo Airport para sa mga biyahe pakadto kag halin sa Hong Kong kag Singapore, ginpabutyag sang opisyal sang DOT nga nangin makalaganyat ang mga datus kag estatistika bangud ini nagpakita nga ang mga taga-luas nga bisita nga nagakadto diri indi lamang nagahalin sa nasambit nga mga pungsod apang naghalin man sa iban nga mga lugar sa Asya kag Europa.

Suno kay Catalbas, ila man ginatulod ang pagpadayun sang standard chartered flights sa Bacolod-Silay Airport sini nga Enero ukon Pebrero amo ina nga ila ginakay-o ang mga kinanglanon sa customs, immigration, quarantine kag iban pa para matigayon ini.

Suno pa kay Catalbas, ila man ginatan-aw ang posibilidad nga magabukas sang flights sa iban nga kaladtuan kasubong sang Incheon kag Busan sa South Korea.

Samtang, ang report sang DOT-6 nagpakita nga sang November 2012, nalab-ot na ang isa ka milyon nga target tourist arrivals sang Boracay. Suno kay Catalbas, kung sang nagligad nga tuig ang target nga tourist arrivals para sa Boracay isa ka milyon, para sa tuig 2013, ini mangin 1.2 ka milyon.

Si Catalbas nagsiling man nga sa Iloilo, ginatanyag na ang mga cultural tour packages nga nagalakip sang pagbisita sang mga makasaysayan nga mga simbahan kag dumaan nga balay kag nagahatag man sang kahigayunan sa mga bisita nga matun-an ang ila kasaysayan kag maghatag pagtamod sa sini nga mga istraktura.

Suno pa gid kay Catalbas, ang DOT-6 nagaplano nga magapatuman sang cultural product development sa sentro sang business district sang siudad kag sang walking tour sa downtown. (JSC/LTP-PIA6 ILOILO)



CABATUAN INTERNATIONAL AIRPORT
Cabatuan, Iloilo, Philippines

Cabatuan.com - Timeline 2013