Hiligaynon news: DTI nagapahaum para sa proyekto nga 'Diskwento Sale'

Hiligaynon news: DTI nagapahaum para sa proyekto nga 'Diskwento Sale'

Friday 18th of May 2012

KALIBO, Aklan, Mayo 18 (PIA) -- Mangin mas maeumo ag maugan sa buesa ro pagbakae it mga ginikanan, maestra ag mga estudyante it mga gaeamiton sa pag-eskuya sa pagbukas ngara it klase bangud sa daywang (2) ka “Diskwento” sale nga proyekto nga ginapahaum it Department of Trade and Industry (DTI).

Ro mga proyekto, suno sa DTI-Aklan, hay pinaagi sa “Balik-Eskwela Diskwento Sale” nga proyekto, nga pagahiwaton halin it Mayo 20 hasta Mayo 31, ag sa "Roving Diskwento” Sale Project nga pagahiwaton sa Mayo 26 sa banwa it Balete.

Ro "Balik-Eskwela Diskwento" nga proyekto para sa dag-on ngara hay igapaagi sa pagtao it ‘discount’ sa bili it mga gaeamiton sa eskuylahan it mga baealigyaan idto mismo sa andang mga pwesto ukon establisimiento.

Ro mga maga partisipar kara hay imaw rong mga lokal nga mga nagabaealigya it mga gamit sa eskuylahan ag upisina sa Kalibo.

Ro "Roving Diskwento" sale project mat-a nga pagahiwaton sa Balete hay paagi sa pagtipon it mgaa manugbaligya sa sangka lugar kon siin sanda hay magabaligya ku andang mga gaeamiton sa eskuylahan ag iba pang mga nagapangunang mga kinahangeanon sa panimaeay.

Igabutang ro "Roving Diskwento” sale project sa Mayor Teodoro F. Calizo Sr. Memorial Civic Center samtang ro mga magabaligya hay ro mga naga produser ukon mga lokal nga nagabaligya it gamit pang-eskuylahan ag mga kinahangeanon sa baeay.

Suno kay DTI-Aklan Provincial Director Diosdado P. Cadena Jr., tuyo ku mga proyekto ngara ro pagtao it oportunidad sa publiko, kapin gid ro mga estudyante ag mga ginikanan nga maeumo nga makabakae it mga barato nga mga gamit pang eskuylahan.

Gindugang pa gid it DTI nga bilang "side activity" it "Roving Diskwento” project, ro mga estudyante it Cinia Cervatos Training Center nga gina-asistihan it Techical Education and Skills Development Authority (TESDA) hay magatanyag man it libreng pedicure, manicure ag bueog idto sa Balete sa adlaw man it proyekto.

Ro unang nga “diskwento” sale it DTI it mga gamit sa eskuylahan hay nakabutang sa Provincial Trade Hall it Provincial Capitol antes sa pagpasalig it mga manugbaligya mismo nga idto lang sanda magbaligya sa andang pwesto pero magatao man gihapon it "discount" sa mga manugbakae. (JSC/VGV-PIA 6 Aklan)

Cabatuan.com - Kasimanwa.com - Diosdado Cadena Jr.