Hiligaynon news: Ginapasanyog sang gobyerno ang programa para sa mga imol sa W.Visayas

Hiligaynon news: Ginapasanyog sang gobyerno ang programa para sa mga imol sa W.Visayas

Wednesday 4th of April 2012

SYUDAD SANG ILOILO, Abril 4 (PIA) -- Ginapasanyog sang gobyerno ang programa nga ginatawag Pantawid Pamilyang Pilipino Program ukon 4Ps para sa pagpanubu sang sitwasyon sang kaimulon sa Western Visyas agod matagaan ang mga imol nga miyembro sang panimalay nga madab-ot ang pila sa mga tinutuyo sang pagpaayo sang sitwasyon nila sa kabuhi.

Ginpabutyag ni Secretary Corazon Juliano-Soliman sang Department of Social Welfare and Development sa iya pagbisita sa Syudad sang Iloilo nga ang 4Ps program nagahatag sabat sa problema sang mga imol nga pamilya pinaagi sag pagtutuk sa kinahanglanon sa edukasyon, nutrisyon kag ikaayong-lawas.

Ginpangunahan ni Soliman ang seremonya sa pagpirmahanay sang Memorandum of Agreement para sa pagpalapnag sang 4Ps sa rehiyon.

May kadamuon nga 261,591 ka mga benepisyaryo ang nasakop sa idalum sang 4Ps sa Western Visayas, hambal ni Soliman samtang iya ginpabutyag nga may yara 2.3 million ka mga beneficiaries sang nagligad nga tuig, kag samtang nagasanyug ang programa “sining bulan sang Marso may yara na kita nga 3,029,827 ka panimalay sa bug-os nga pungsod, kag ini nagabenepisyo sa 7 million ka mga naga-edad 0 tubtub14 anyos”.

Ginpasalamatan ni loilo Governor Arthur Defensor Sr. si Secretary Soliman sa paghatag espesyal nga atensyon sa probinsya sang Iloilo kon bahin sa proyekto nga may katuyuan sa pagpahagan-hagan sang problema sa kabuhi sang mga imol.

Sa ginhiwat nga seremonya, onse (11) ka mga LGUs sang Iloilo ang nagpirma sang MOA sa DSWD kag ini ang mga munisipalidad sang Badiangan, Barotac Nuevo, Cabatuan, Dingle, Dumangas, Estancia, Mina, New Lucena, Pototan, Tigbauan, kag Zarraga.

Ang kahiwatan gintambungan man sang 25 ka mga Civil Society Organizations, Regional Directors sang National Government Agencies; Branch Managers sang Land Bank of the Philippines; kag mga pangulo sang League of Municipalities of the Philippines nga nagikan sa mga kaprobinsyahan sang Aklan, Antique, Guimaras, Capiz, Negros Occ. kag Iloilo.

Gindugangan sang duag ang kahiwatan sang ginpagpasidunggan ang probinsya sang Capiz, kag Syudad sang Iloilo para sa ila best practice sa pagpatuman sang Pantawid Pamilya, kag ang Munisipalidad sang Ajuy, Iloilo sa ila maayo nga implementasyon sang KALAHI CIDSS.(JSC/VWV-PIA6 Iloilo)

Cabatuan.com - Timeline 2012