Hiligaynon news: Ginpabutyag sang Gobernador ang nahimuan sang iya administrasyon sa SOPA

Hiligaynon news: Ginpabutyag sang Gobernador ang nahimuan sang iya administrasyon sa SOPA

Friday 10th of August 2012

SYUDAD SANG ILOILO, Aug 10 (PIA) -- Ginpasalamatan ni Iloilo Governor Arthur Defensor, Sr. ang linibo ka mga Ilonggo volunteers nga nagbulig sa iya sa pag-atubang sa mga pagpanghangkat sang mga kalamidad nga ginabalik sa aton sang nasamad naton nga environment, pinaagi sa pagpananum sang 1.4 million ka gutuk sang mga kahoy, samtang iya ginreport sa mga Ilonggo ang accomplishments sang iya administrasyon pagkalipas sang duha ka tuig nga pagpangalagad.

Ang nahimuan sang iya administrasyon iya ginpabutyag sa iya State of the Province Address ukon SOPA nga ginhiwat sini lang sa Iloilo Capitol.

Sa pag-amlig sa Kalibutan (Earth) ginkalipay ni Defensor sa pagpabutyag nga “aton nalampuwasan ang aton target pinaagi sa pagtanum sang 1.4 milyon ka mga kahoy nga may 65 porsyento nga survival rate, kag ang aton mga volunteers nagpakita sa aton sang pinakamaayo nga pamaagi nga makaluwas sa mga pamahog sang environmental degradation amo ang tililingub nga paghulag para sa environmental rehabilitation.

Gindayaw ni Defensor ang mga Barangay Service Point Officers bangud sa ila pagbantay para mabuhi ang gintanum nga mga gutuk sang kahoy, kag iya man dayon ginpanawagan ang mga Ilonggo sa pagpasakup naman sa masunod nga bulan nga pagpananum sang isa ka milyon nga kahoy kag 500,000 ka gutuk sang bakhaw ukon mangroves.

“Ang aton nga million trees amo ang aton long-term contribution para mapahagan-hagan ang 'impact' sang indi na balance nga ekolohiya sang kalibutan nga nagadala na sang makahalalit nga mga bagyo kag baha sa aton probinsya,” hambal sang gobernador.

Sa iya nga SOPA, ginpabutyag ni Defensor ang lihok sang iya administrasyon sa paghatag solusyon sa mga problema sa kaimulon, gutom kag pamalati-an.

“Ini ang kabangdanan nga nagpagwa (release) kita sang P73.3 milyones para sa PhilHealth enrollment sang 71,209 ka mga pamilya, sakup sa panahon sang January 1, 2012 tubtub December 31, 2013,” pagdeklarar ni Defensor.

Sa karon nga tuig, pagatutukan sang pangulohan probinsyal ang malapnagon nga hospital improvement program pinaagi sa dugang nga pundo nga P500 milyones para mapaayo ang 12 ka mga hospitals ilabi nagid sa apat ka mga hospitals - ang Iloilo Provincial Hospital sa Pototan, ang Ramon Tabiana Memorial District Hospital sa Cabatuan, ang Sara District Hospital sa Sara kag ang Rep. Pedro Trono Memorial Hospital sa Guimbal.

Ang gobernador nagsiling nga para makahatag sang universal access para sa basic education, "kita nagpamuhunan sang P34 milyones pinaagi sa pagkuha sang serbisyo sang 300 ka mga manunudlo (teachers) kag P39.4 milyones para sa konstruksyon kag pagkaayo sang mga hulot klasehan kag school facilities sa karon nga tuig.”

Samtang, ginpabutyag man ni Defensor sa iya SOPA ang nanuhaytuhay nga mga kadalag-an sa pagpatuman sang mga programa sa agrikultura, edukasyon, kalinong kag katawhay, social services, kag good governance.

Ginpabutyag man sang Gobernador nga siya nagpanumbalik sa pagpangalagad indi sa paghangad sang poder ukon manggad, kundi bangud sa paghigugma sa pagserbisyo sa mga tao sang probinsya sang Iloilo. (JSC/VWV-PIA6 Iloilo)

Cabatuan.com - Timeline 2012