Hiligaynon news: Isa na ka ganhaan para sa kalibutan ang Iloilo, suno kay Drilon

Hiligaynon news: Isa na ka ganhaan para sa kalibutan ang Iloilo, suno kay Drilon

By Vicente W. Villavert, Monday 12th of November 2012

SYUDAD SANG ILOILO, Nob 12 (PIA6) -- Ginpanawagan ni Senator Franklin Drilon ang mga opisyales sang syudad kag probinsya sang Iloilo sa pagbuligay sa pagtib-ong sa Iloilo nga magmangin makagalanyat nga kaladtuan sang mga turista agud nga mangin tayuyon ang mga international flights pa-Hong Kong kag Singapore.

“Ang Iloilo isa na karon makabig nga international gateway, nga nagaangut sang Western Visayas sa iban nga bahin sang kalibutan pinaagi sa HongKong kag Singapore,” pahayag ni Drilon sa inaugural launch sang Cebu Pacific International flights sa Iloilo sini lang.

Suno kay Drilon madamo ang iya mga plano agud nga himuon ang Iloilo nga makagalanyat bilang tourist destination kag ini maga-involve sang madamo nga mga pagpamuhunan para sa mga pampubliko nga mga proyekto imprastraktura.

“Akon igalakip sa 2013 budget ang kantidad nga P2.5 million para sa Bureau of Immigration para sa pagbakal sang apat ka mga passport scanners, kag dapat makaangkon na kita sina nga kasangkapan sa Enero sa masunod nga tuig,” hambal ni Drilon samtang iya nanotahan ang kakulang sang sini nga kasangkapan sa airport.

Sa pagpahamtang sang Iloilo bilang distinasyon sang mga turista kag ganhaan para sa mga conventions, ginsiling ni Drilon nga “sa masunod nga simana aton ipaalinton sa publiko ang isa naman ka legacy project nga amo ang mapakilala sa Iloilo bilang ‘destination of conventions’, pero indi ko pa anay ini mapahayag karon”.

Si Candice Iyog, Cebu Pacific Vice-President for Marketing and Distribution nagsiling nga ang Cebu Pacific komitido sa pag paluntad sang ‘connectivity’ sa Iloilo kag Western Visayas, pinaagi sa pagpahamtang sang eroplano (aircraft) diri, kag himuon ang Iloilo nga isa sa mga operational hubs sang eroplano.

“Amon ginapatihan nga ang international routes magabukas sang opurtunidad para sa industriya sang turismo kag negosyo sa Iloilo kag sa iya sini mga kaiping nga mga lugar, kag mapabugal man namon ang amon mabulig para sa kauswagan sa rehiyon,” pahayag ni Iyog sa isa ka press statement.

Ang Iloilo-Hong Kong service nagsugud sa Iloilo Airport mga 11:10 sa gab-I sadtong Nobyembre 8. Gin-abi-abi naman sang Iloilo ang iya sini nahauna nga mga international passengers gikan sa HongKong mga 4:45 sa kaagahon sadtong Nobyembre 9, 2012 nga ginlakipan ni Consul General Noel Servigon gikan sa Philippine embassy sa Hong Kong, kag mga nagapanguna nga mga overseas Filipino group leaders sa Hong Kong.

Ang nahauna nga Iloilo-Singapore flight sa pihak nga bahin, ginsugdan sang Nobyembre 9, 10:40 sa gab-i.

Sa sini nga maayo kag madinalag-on nga pagluntad nga mga hilikuton, dako ang kalipay ni Drilon nga iya napahayag nga “karon pwede na naton matawag ang aton Iloilo Airport bilang Iloilo International Airport”.(JSC/VWV-PIA6 Iloilo)



CABATUAN INTERNATIONAL AIRPORT
Cabatuan, Iloilo, Philippines

Cabatuan.com - Timeline 2012