Hiligaynon news: Jamindan PNP ikatatlo nga Most Citizen-Friendly sa rehiyon

Hiligaynon news: Jamindan PNP ikatatlo nga Most Citizen-Friendly sa rehiyon

By Alex A. Lumaque, Tuesday 11th of September 2012

SYUDAD SANG ROXAS, Set 11 (PIA) -- Ginbaton nanday mayor Ethel R. Jinon sang banwa sang Jamindan sa Capiz subongman Senior Insp. Roman B. Salazar Jr. nga hepe sang Jamindan Police Station ang plaque of recognition kag P5,000 nga cash bilang pang-tatlo nga nagdaug sa banwa nga kategoriya sang rehiyonal nga lebel nga paindis-indis sang pinaka-mainabyanon sa publiko nga police station.

Ang award ang ginhatag ni Chief Supt. Agrimero Cruz nga amo ang direktor sang Police Regional Office (PRO)-6 sa tion sang awarding ceremony para sa kompetisyon sang Septyembre 3 sa Freedom Grandstand sa syudad sang Iloilo.

Nahibaluan nga ang Jamindan PNP ang may programa para sa mga senior citizen ukon katigulangan kag nagapatigayon sang outreach nga programa sa komunidad.

Samtang nakuha sang Cabatuan Police Station sa Iloilo ang nahauna nga pwesto kag Kalibo Police Station sa Aklan ang pangaduha nga pwesto sang kapareho nga kategoriya sang kompetisyon.

Sa mga PNP station sa syudad, ang Jaro PNP sa syudad sang Iloilo nga ginapamunuan ni Chief Insp. Gilbert Gorero ang nakakuha sang nauna nga lugar sang kompetisyon samtang ang San Carlos City Police Station ang nakakuha sang ikaduha nga lugar kag Silay City Police Station amo ang nagpangatlo sa paindis-indis.

Ang mga nagpanguna nga police station ang nagbaton sang P15,000 nga cash kag lima ka tapak nga Most Citizen Friendly nga imahe.

Ginpaabot ni Cruz sa iya mensahe sa tion sang awarding ceremony ang pagpanginbulahan sa mga nagdaug nga police station bangud sang ila maayo nga performance sa pagpaabot sang serbisyo publiko.

Subongman ginhingyo man sang opisyal sang PNP ang publiko nga magbulig sa kampanya sang kapulisan nga mapaiway ang pagluntad sang krimen sa kumonidad. (JSC/AAL-PIA6 Capiz)

Cabatuan.com - Timeline 2012