Hiligaynon news:
Mga aktibidades sa Consumer Month preparado it DTI


Hiligaynon news: Mga aktibidades sa Consumer Month preparado it DTI

By Venus G. Villanueva, Friday 12th of October 2012

KALIBO, Aklan, Okt 12 (PIA) -- Abu nga mga aktibidades nga magadugang sa paghisayud it mga kunsumidor ro ginlinyada it Department of Trade and Industry (DTI) sa pagselebrar it Consumer Welfare Month sa buean ngara it Oktubre.

Ginhambae ni DTI-Aklan Provincial Director Diosdado P. Cadena Jr. nga ro pagselebrar it Consumer Welfare Month hay suno sa Presidential Proclamation No. 1098, kon siin sa dag-on ngara, ro DTI ro nagapamuno nga ahensya.

Sa giya it tema makarong dag-on nga “Get Organized. Be Heard. Be Empowered,” ginhambae ni Cadena nga may serye it mga aktibidades nga ginpreparar ro DTI agud hipabaskog ro paghisayud it mga pumueuyo nahanungod sa mga adbokasiya ag programa it gobyerno para kanda.

Raya nga mga aktibidades hay ginaeakutan it pagbitay it mga “streamers” sa upisina it DTI ag sa iba pang mga ahensya it gobyerno sa bilog nga buean it Oktubre, kampanya sa impormasyon sa mga diretso it mga kunsumidor ar responsibilidad, pagbantay sa presyo it mga nagapangunang baeakeon pati eon ro para sa paskwa, ag “Diskwento Sale” nga pagahiwaton sa banwa it Numancia sa Oktubre 19.

Magahiwat man ro DTI it sangka “Forum on Consumerism” sa Oktubre 26, imaw man rong Provincial Consumers Assembly ag Induction of Officers it Balete ag Madalag Consumers Associations.

Pakapakigsakupan ro forum it sari-saring sektor it sosyedad, samtang ro mga humaeambae hay magahalin sa Department of Agriculture, DENR ag DTI.

Ginasaligan man nga tambungan ro forum nanday Governor Carlito Marquez, Kalibo Mayor William Lachica ag Poblacion Kalibo Barangay Captain Mary Jane Rebaldo. (JSC/VGV-PIA6 Aklan)

Cabatuan.com - Kasimanwa.com - Diosdado Cadena Jr.