Hiligaynon news: Nat'l Greening Program naghingyo suporta sang mga empleyado, estudyante

Hiligaynon news: Nat'l Greening Program naghingyo suporta sang mga empleyado, estudyante

By Lilibeth A. French, Thursday 4th of October 2012

SYUDAD SANG ILOILO, Okt 4 (PIA) -- Ang Community Environment and Natural Resources Office sa Iloilo ang nagpanawagan sa mga empleyado sang gobyerno kag estudyante nga aktibo magpakigbahin sa mga pagpanikasog natuhoy sa pagpatubo sang kahoy agud mapat-ud nga ila matuman ang ila bahin sa National Greening Program sang gobyeno.

Si CENRO Iloilo NGP Coordinator Forester Christopher L. Lastica nagsiling nga sa idalum sang National Greening Program sandig sa Executive Order No. 26 nga ginpaguwa ni Presidente Benigno Simeon C. Aquino sang Pebrero 24, 2011 ang tanan nga empleyado sang gobyerno kag estudyante kinahanglan nga magtanum sang 10 ka kahoy sa tagsa ka tuig sa sulod sang anum ka tuig sa mga lugar nga ginkilala sang Department of Environment and Natural Resources kag iban pa nga natungdan nga ahensiya.

“Ini nagakahulugan nga kinahanglan makatanum kamo sang minimum nga 60 ka kahoy tubtub sa 2016 (This means you are required to plant a minimum of 60 trees until 2016),” siling ni Lastica pagkatapos sang iya malip-ot nga pagpaathag natuhoy sa NGP kag kon paano ang husto nga pagtanom sang kahoy sa malapit sa 200 ka mga empleyado sang gobyerno kag estudyante nga nagpasakop sa Tree Growing – Urban Greening sa Brgy. Tigum, Pavia sang nagligad nga Oktubre 2. Ang aktibidad ginpangunahan sang Regional Statistical Coordination Committee sa Kabisayaan Nakatungdan may kaangtanan sa selebrasyon sang National Statistics Month sini nga Oktubre.

Ang NGP nagahugpong sang tanan nga mga greening efforts sang pribado kag publiko nga sektor pinaagi sa pagtanum sang kapin sa 1.5 bilyon ka kahoy sa 1.5 milyon ka ektarya nga pangpubliko nga duta humalin 2011 tubtub 2016 sa bilog nga pungsod.

Si Lastica nagsiling nga ang Pavia nalakip sa 13 ka mga munisipyo sa probinsiya nga sakop sang mga prayoridad nga lugar sa idalum sang NGP nga nagalakip sa mga urban areas sa idalum sang greening plan sang lokal nga panguluhan. Iban pa nga munisipalidad nagalakip sang Miag-ao, Igbaras, Alimodian, Leon, San Joaquin, Tubungan, Tigbauan, Oton, San Miguel, Sta. Barbara, Cabatuan kag Maasin.

Para sa 2012, ang CENRO Iloilo may target sang kapin sa 926,400 seedlings nga ginabug-usan sang tumandok, bungang kahoy, kag madasig nga nagatubo nga mga sahi sang kahoy nga igatanum sa kapin 1,866 ektarya.

Sa 1,866 ka ektaryas, si Lastica nagsiling ang 1,800 ektaryas nahamtang sa mga binukid nga lugar sa banwa sang Maasin, Alimodian, Leon, Tubungan, Igbaras, Miag-ao kag San Joaquin kag ang nabilin nga 66 ektaryas ang sa siudadnon nga mga lugar nga ginkilala sang lokal nga panguluhan para sa ila urban greening.

Magluwas sa mga siudadnon nga lugar sa idalom sang greening plan sang mga lokal nga panguluhan, iban pa nga mga prayoridad nga lugar sa idalum sang NGP ang mga kagulangan, mangrove kag mga protektado nga lugar, ancestral domain, mga civil kag military reservation, indi aktibo kag gin-abandonar nga minahan kag pangpang sang suba.

Si Lastica nagapati nga ila malab-ot ang ila target bag-o magtapos ang tuig sa kooperasyon nga ginapakita sang mga lokal nga residente sa implementasyon sang programa sa mga nasakop nga lugar. Ginhatagan man niya pagtamod ang suporta sang mga organisasyon sang mga tawo sa pagpat-ud nga may yara sang nagakaigo nga produksyon sang maayo nga sahi sang kahoy para sa tanan nga mga pagpanikasog sa pagpananum sang kahoy nga gina-organisar sang mga ahensiya sang gobyerno kag pribado nga sektor.

“Ang hinyo para sa pagkilala sang mga posible nga lugar para sa pagpananum sang kahoy sa amon talatapan ang madamo (The request for identification of possible sites for tree planting in our office is overwhelming),” siling ni Lastica, kadungan sa iya man pagkilala sa mga suporta inisyatibo sang mga lokal nga panguluhan may kaangtanan sa programa kasubong sang programa nga ART sang gobyerno probinsiyal sang Iloilo nga nagatuyo sa pagtanum sang isa ka milyon nga kahoy sini nga tuig.

Suno kay Lastica sa idalum sang NGP, ang DENR nagahatag kag nagadeterminar sang sahi sang kahoy nga igatanum sa mga ginkilala nga lugar agud mabuhinan ang pagkamatay sining mga gutok sang kahoy. Subong man ginamonitor sang DENR ining mga pagpanikasog sa pagtanum kag pagtubo sang kahoy sa bulig sang mga komunidad kag organisayon nga magabenepisyo sang mga produkto gikan sa sining mga kahoy. (JCM/LAF-PIA6)

Cabatuan.com - Timeline 2012