Hiligaynon news: P1M nga bulig pinansyal ginhatag sa 5 ka mga teen centers sa Iloilo

Hiligaynon news: P1M nga bulig pinansyal ginhatag sa 5 ka mga teen centers sa Iloilo

By Vicente W. Villavert, Thursday 25th of October 2012

SYUDAD SANG ILOILO, Okt 25 (PIA) -- Nagabalor P1 million nga mga tseke nga tag P200,000.00 ang ginpanagtag sa lima ka mga Teen Centers sa nanuhaytuhay nga mga munisipalidad sang probinsya sang Iloilo ni Gobernador Arthur Defensor Sr. para mabuligan nga mapabakud ang sektor sang mga lamharon.

Ini ang ikaduha na nga batch sang mga teen centers nga na-establisar sugud sang tuig 2011, kag ini nahamtang sa Igbaras National High School, sa munisipalidad sang Igbaras; Leonora S. Salapantan National High School sa San Miguel; Cabatuan National Comprehensive High School sa Cabatuan; Dumangas National High School sa Dumangas; kag Sara National High School sa Sara.

Ang nahauna nga batch nga gin-establisar sang tuig 2011 yara sa mga munisipalidad sang Oton, Pavia, Lambunao, Dingle kag San Dionisio.

Ginpabutyag ni Provincial Population Officer Ramon C. Yee nga ang pagpahamtang sang mga school-based teen centers isa sa mga nagapanguna nga programa sang pangulohan probinsyal para mabuligan ang mga lamharon sa bahin sang ila social development.

“Ang sentro mangin lugar sang mga pamatan-on nga makapalipas sang ila panahon sa pagpasanyog pa gid sang ila kinaadman, ihibalo sang mga isyu nga mahimo ila mapangatubang. Ang sentro may tinutuyo man sa pagpanubu sang mga problema bahin sa teenage pregnancies, substance abuse, sexually transmitted infections kag iban pa nga mga problema sosyal sang mga lamharon,” hambal ni Yee.

Ang kantidad paggamiton sa pagpamakal sang mga kagamitan, pagpakay-o sang mga Sentro, pagpa-imprinta sang mga IEC materials, kag para sa pagpatigayon sang trainings kag capability building.

Bangud sang daku nga handum ni Governor Arthur Defensor nga mabuligan ang sektor sang mga pamatan-on iya ginpahayag ang pagdugang sang P100,000.00 nga kantidad sa tagsa ka lima ka mga recipients sang second batch sang teen centers kag ang kantidad “iga release sa bulan sang Enero sa masunod nga tuig”.

Luyag ni Defensor nga mapadasig ang pagpahamtang sang mga teen centers sa 42 ka mga munisipalidad kag isa ka component city sa probinsya, kag ginaplano nga 12 ka teen centers tagsa ka tuig ang pagatukuron. Iya man ginpanawagan ang bug-os nga suporta sang mga ‘stakeholders’ para sa kadalag-an sang programa.

Bilang sabat sa panghangkat sang Gobernador, naghatag sang commitment si Igbaras Mayor Vicente Escorpion Jr., nga magasuporta sa mga Teen Centers bangud “ang ini nga programa makabulig gid sang dako sa iban pa namon nga mga programa para sa mga pamatan-on nga kon sa diin sila ang ginakabig namon nga hamili nga maggad”.(JSC/VWV-PIA6 Iloilo)

Cabatuan.com - Timeline 2012