Hiligaynon news:Pantawid Pamilya ginpasangkad sa 32 ka bag-o nga lugar sa KN

PIA Press Release Saturday, January 07, 2012

Hiligaynon news:Pantawid Pamilya ginpasangkad sa 32 ka bag-o nga lugar sa KN

ni Lilibeth A. French

SYUDAD SANG ILOILO, Enero 7 (PIA) -- Ang Department of Social Welfare and Development (DSWD) Field Office 6 nagpasangkad sang programa Pantawid Pamilya sa 32 ka dugang nga mga bag-o nga lugar sa Kabisayaan Nakatungdan nga magadala sang dugang nga 108,775 ka mga potensyal nga mga puluy-an nga benepisyaryo.

Tuga sang pagpasangkad, ang programa nagasakup na sa karon sang 118 ka mga banwa sa rehiyon sa kabilugan nga 133.

Ginpahayag ni DSWD 6 Pantawid Pamilya Program Information Officer Alma Joronadal ang 32 ka mga bag-o nga lugar nagalakip sang 10 ka banwa sa probinsiya sang Capiz nga sakup sang implementasyon sang Set 4 E kag 22 ka iban pa sa kaprobinsiahanan sang Aklan, Antique, Guimaras kag Iloilo nga sakop sang Set 5 implementation sang programa nga gindesinyo agud mapasanyog ang nutrisyon, edukasyon kag ikaayong lawas sang mga imol nga pamilya nga may mga kabataan nagapangidaron 0-14 anyos.

Tinutuyo man sang programa nga masabat ang millennium development goals sang pungsod kasubong sang pagpahaganhagan sang kaimolon kag kagutom, malab-ot ang universal primary education, kag mapanubo ang mortality kag mapaayo ang ikaayong lawas sang mga iloy.

Sa paglakip sa Panitan, Roxas City, Pontevedra, Cuartero, Dao, Dumarao, Dumalag, Ivisan, Sigma kag Mambusao sa Set 4 E implementation, ang programa nagasakop na sa karon sa tanan nga 17 ka banwa sang Capiz.

Samtang ang 22 ka iban pa nga bag-o nga lugar sa rehiyon sa idalum sang Set 5 implementation ginalakipan sang banwa sang Lezo sa Aklan; Hamtic, Pandan, Sibalom kag Tobias Fornier sa Antique; Jordan, Nueva Valencia sa Guimaras; Badiangan, Barotac Nuevo, Cabatuan, Estancia, Mina, Tigbauan, Dingle, Dumangas, New Lucena, Pototan kag Zarraga sa Iloilo; kag Talisay City, Victorias City, La Carlota, kag Silay City sa Negros Occidental.

Kadungan sang pagpasangkad sa lima ka mga probinsiya sa rehiyon kapin sa 108,775 ka potential household beneficiaries ang magadugang sa karon nga 173, 669 sa Sets 1-4 implementation. Sa idalom sang Sets 1-5 implementation, ang kabilugan nga household grantees sa rehiyon ginapaabot nga magalab-ot sa 282,444.

Suno kay Joronadal ang community assemblies ukon validation sang mga benepsiyaryo ang nakumpleto na sa mga masunod nga lugar: Capiz tubtub sang Disyembre 14, 2011; Aklan sang Disyembre 15, 2011; Negros Occidental sang Disyembre 17, 2011; kag Guimaras sang Enero 6, 2012.

Samtang ang kasubong nga aktibidad ang natalana sa probinsya sang Antique kag pila ka mga kabanwahanan sa Iloilo sini nga bulan.

Tubtub sang Disyembre 12, 2011, sandig sa DSWD report ang Pantawid Pamilya gina-implementar sa 950 ka mga banwa, 77 ka mga syudad kag 79 ka mga probinsiya sa tanan nga rehiyon sa bilog nga pungsod nga nagasakop sang kapin sa 2.3 milyon ka mga imol nga puluy-an. Ang programa nagatarget sa pagsakop sang dugang nga 700,000 ka mga puluy-an agud makumpleto ang 3 ka milyon nga mga puluy-an sa katapusan sang 2012. (JSC/LAF-PIA6 Iloilo)

Cabatuan.com - Timeline 2012