Waray-Waray News: Ginastohan hin bilyones nga airport simbolo hin "political will"

PIA Press Release 2007/06/15

Waray-Waray News: Ginastohan hin bilyones nga airport simbolo hin "political will"

BORONGAN, Eastern Samar (June 15) -- Simbolo daw hin ginkaurosaan nga "political will" ug kanan tawo suporta an yana kinikita nga mabaysay nga airport ha probinsiya han Iloilo.

Amo ini an siring ni Presidente Gloria Macapagal Arroyo dida han pag-inagurara han 8-bilyones nga Iloilo airport kasangkulop nga adlaw. Ginsabi han Presidente nga an Iloilo airport an pinakamoderno nga airport yana ha Pilipinas nga kompleto hin moderno nga pasilidad nga kon tawagon "state-of-the-art facilities".

Idinugang pa han Presidente nga hi Congressman Arthur Defensor daw hadto an naghatag hin konsepto ug iginpatuman naman ni Gobernador Neil Tupas.

Para daw han mga Taga-Iloilo, inabot na an takna nga maiha na nira nga ginhihiningyapon ug yana hira bulig na an ira mga pag-aranyaw nga mga probinsiya in mayda na igdadasig nga airport yana nga daw gud, magigin-kaparte han dako nga pag-ursa pa han ekonomiya didto nga dapit.

Sumala han report, an Iloilo airport in aada ha 188 ka ektarya nga solar harani han Cabatuan ug Sta. Barbara nga mga bungto, ine in 20 kilometros tikang han ira daan nga airport. Mahihimo daw nga makapagserbisyo ine hin 1.2-M nga pasaheros ug 11,500 ka tonelada hin kargos ug epektos.

Igindadasig han Presidente ine nga Iloilo airport tungod kay sample pa daw la ine han damo pa nga sugad nga mejores ug kalungganayan nga mahimo mahihatag han iya administrasyon ngada han katawhan tungod han mga reporma ha panalapi nga iya ipinatuman bisan kon ginbabatak hiya hin mga pagsuson.

Yana daw nga klaro na an panalapi han nasud labot han mga moderno nga pasilidad sugad han Iloilo airport, damo na nga mga imbestor an napakanhi ha nasod agud mamuhunan ngan maghatag trabahoan ha mga Pinoy.

An probinsiya ha Iloilo in usa han gintudlok ni PGMA nga major investment and tourist destination ha Visayas nga daw tourism belt ngan iya ginkilala ha ilarom han Central Philippines Super Region program. (PIA-Eastern Samar)



CABATUAN INTERNATIONAL AIRPORT
Cabatuan, Iloilo, Philippines

Cabatuan.com - Timeline 2007