Waray news: Environmental Ombudsman naglunsad Solid Waste Management Compliance Program

Waray news: Environmental Ombudsman naglunsad Solid Waste Management Compliance Program By Marivic A. Alcover

Thursday 25th of April 2013

MANILA, Abril 25 (PIA) -- An Office of the Ombudsman (OMB) en naglunsad dida han Abril 22, 2013, dida han tinuig nga pag-obserbar han Earth Day, han Solid Waste Management Compliance Program nga an panuyo amo an pagbantay han kanan lokal nga pangobyernohan pagsunod han Republic Act (RA) No. 9003 (Ecological Solid Waste Management Act of 2000).

Dida han iya panguna nga pagyakan han gindumara nga pormal nga seremonyas han paglunsad didto ha OMB Function Room, nakita ni Ombudsman Conchita Carpio Morales an kanan Ombudsman awtoridad pagmando hin maski hin-o nga opisyal o empleyado han gobyerno pagdumara ngan pagpadaro-dagmit hin usa nga burohaton o obligasyon nga ginkikinahanglan han balaud.

Dugang pa ni Ombudsman Morales nga bali usa nga nagpapagius han mga serbisyo han gobyerno, an Opisina han Ombudsman en may obligasyon pagseguro nga an panguna nga mga serbisyo en mapapahamtang ngadto han katawhan, kun diin nag-uupod pagpagius han mga ahensya han gobyerno pagdumara han era mga obligasyon ha ilarum han R.A. 9003.

Dida han iya presentasyon, hi Deputy Ombudsman para ha Luzon ngan Environmental Ombudsman Gerard Mosquera en nagsering nga imbes han regular nga padalagan han imbistigasyon ngan prosecution, an programa en naatubang han problema han pagigin waray aksyon o kakulang hin interes kun diin nakikita han environmentalist nga hi Atty. Antonio Oposa, Jr. bali 'power of the stationary.'

"Pinaagi han paggamit han kanan Ombudsman letterhead, an mga surat en random nga igpapadara ha mga pinili nga nasyonal nga mga ahensya ngan mga lokal nga pangobyernohan para maghangyo hin impormasyon parti ha era pagsunod han mga nakapahamtang dida han RA 9003, kun diin an mga impormasyon nga nahikay en ig-eebalyuwar hin usa nga technical working group nga nakumponi hin mga representante nga natikang ha Environmental Ombudsman nga grupo ngan civic organizations," pag-esplikar ni DO Mosquera.

"Ha kanan sunod nga tuig selebrasyon han Earth Day, an Opisina en nagpaplano pagrekognisar han pinaka-maupay nga nagtatrabaho nga mga ahensya han gobyerno ngan mga lokal nga pangobyernohan parti han pagsunod han solid waste management law," dugang pa niya.

Dida han iya pagyakan, eginpahamtang ni Ombudsman Morales an statistics tikang ha National Economic Development Authority (NEDA) nga nagpapakita hin siyam (9) la dida han 17 nga mga lokal nga pangobyernohan ha Metro Manila en nagsumite hin Solid Waste Management Plan, miyentras 414 la ha total nga l,610 nga LGUs han nasud an nagsunod han national plan ha 2012, kun diin nagpapahamtang ngada ha 52.9% compliance rate para Metro Manila ngan 25.7% la nga compliance rate para ha national level.

Ha kuoperasyon han Department of Environment and Natural Resources (DENR), Department of the Interior and Local Government (DILG) ngan han Metropolitan Manila Development Authority (MMDA), an programa en nakikig-usa gihapon han mga environmental nga mga grupo sugad han Zero Waste Philippines Inc., Mother Earth Foundation, Eco-Waste Coalition, ngan han Bangon Kalikasan Movement.

Hera DENR Undersecretary Ernesto Adobo, DILG Undersecretary Austere Panadero, MMDA Chairman Francis Tolentino – nga puro ex-officio member agencies han National Solid Waste Management Commission en nagpagawas han era suporta ngan nakig-usa kan Ombudsman Morales ha pagpirma han “Manifesto of Commitment,” kaupod ni United Nations Development Programme (UNDP) country director Toshihiro Tanak ngan han mga narepresentar han iba-iba nga mga civic organizations. (eot/Trans. by MAA/PIA-8)

Cabatuan.com - Kasimanwa.com - Austere Panadero