Ang Bayong Kag Banga
Sugiran ta kamo, kag akon isaysay isa ka natabu sa isa ka lin-ay, matahum sing guya, sing lawas matibsul, bukad sang kabugaw, daw bukol sang doldol... Kong magka-agahon, nagasipit sang banga, kay siang magasag-ub sing tubig sa suba... Banga nia mabilog, kay diutay sing baba, matapuk sing buli kag dali mabuka. Sa amo nga ti-on, isa ka binata, kay sia man masag-ub sa pang-pang sang suba,	iya nga nakit-an sang iya paglantaw ma-anyag nga lin-ay sang gugma gapukaw Dayon pinatindog bayong nga kawayan agud nga si Inday iya mabuligan... Apang sa hinali ang bayong napukan, nabu-ong and banga kay among natup-an... Gani mga nene, inyo gid amligan nga'ng inyo banga dili mapukanan agud sa gihapon kamo may sulodlan kag kamo may tubig nga sarang ma-imnan.
Sa Dalagang' Ilong-Ilonganon
Mutya nga labing masili Sang Kabisay-an nga baybay, Batyaga ang akon balaybay Sa dughan nimong hamili; Ikaw sang Diwa ginpili Nga kalipay kag kapawa Kay ang imo halimbawa Matahum nga banagbanag, Ang putli nimong kasanag Sang dampog nagapahawa Puni ka sang kalibutan Kag sang Ginuo gintanyag Ang himpit nimong' kaanyag Sa duta kong nalulotan; Akon ka ginadulutan Sing bulak sang pag-ambahan, Ikaw sang gugma simbahan Kag tuburan sang himaya, Bukad nga dili malaya, Dugos sang pagkabulahan...! Labi ka pa sa bulawan, Labi ka pa sa bituon; Sa dughan amon taguon Balaan nimong larawan, Sang dungog ikaw ban-awan Nga dapat ipabantala, Sa tunga sang taliwala Kag sa kasanag sang adlaw, Kon ikaw magkulukadlaw Ang sakit nagakapala...! Kabay pa mangin huaran Ang bukol nimo nga bulak, Kabay pa dili mapulak, Sa sawi nga kapalaran; Sing dugu akon halaran Maugdang mong pamatasan, Agud, bisan mapilasan Kag sa lulubngan magdayon, Sa gamot sang kamatayon Manugdo ang Kaluasan...! Daw bulak ka sang sampaga Nga wala'y dalang salait, Pispis ka sang paghidaet Kag kabugwason sa aga... Oh, mayuyum nga dalaga Nga sa Ilong-Ilong sumilak, Diwa kang makahililak Nga kumunsad sa Madyaas Kag ang dungog mong' mataas Dili mabaylo sang pilak...! Guya mong' manayanaya Ilingig sa nasakitan, Ang kasakit nga dalitan Ang imo yuhum lipaya; Ang hulunihon sang maya Sa kadadalman sang talon, Nagsuno sa akon bikwalon Nga tingug sa pagsaulog, Agud mo lamang ihulog Ang gugma mong malahalon...!	Yari na sa imo atubangan Dala'ng taming kag sanduko, Pagdaug ang ginabuko Sa tanan nga dalagangan; Kag kon sin-ong makulangan Mangahas sa imo magmulay, Sa akon kusog magahulay, Mapukan sa kahamakan Agud sia pagatapakan Sang imo nga pagkaulay...! Kadugo sang Baganihan, Kaliwat sang Manunugma, Gindulot sang paghigugma Sa Gining nga nawilihan... Gumikan ako sa Amihan, Duta sang mga Pandita, Nagkari sa pagpangita Sa imo, nga nagapasilong Sa langit sang Ilong-Ilong Kag sa pakpak sang balita...! Mapung-aw ang hulunihon Sang Subing ko kag Tulali, Daw lagpuk sang ginakali Nga lungon, sa kagab-ihon... Imo lang abiabihon Ang tangis kong' ginahalad Kay ining kubos sing palad Nga sa kalipay ginkuha Nagainum sang iya luha Dala pa ang batyay nga salad... Sa tunga sang kabudlayan Sing kusog ka makahatag Agud masulit sa patag Ang bantog nga pag-awayan, Kon ang latagon agayan Sang dugong nagasagabay Kag lamang ang pag-unahay Sa kapagsik amo'ng anyo, Patadyong nimo kag panyo Ang akon magin hayahay...! Gani, dili ka mahangawa Nga ang banwa mangin ulipon, Kay kami nagatilipon Bangud sang imo kapawa Sang imo nga pagkaawa Sa Anak nga nalulotan Di' mas-a matugotan Nga may maglupig sa amon, Kay ikaw ang iloy namon Sa ibabaw sang kalibotan. Kunina, kon panaglitan Mahamak ang akon lawas Kag ang kabuhi magkawas Sa pilas sang kasakitan, Kon basi ako'ng painitan Sa udto nga labing masili Nga'ng handong igadumili Sang kaaway kong' bakakon, Putsa man ang bangkay nakon Sang lambon nimong' hamili...!
Ako ang mabalik...
Mahapdi sa dughan Nga wala'y ka-angay, ang pagpanakayon sa iban nga baybay; ang gugma mabilin kag di na makita. sa mga tini-on nga puno sing kagha...   Ayhan mangalipay agud lang malimtan; mangita sing bag-o nga init sang dughan. Apang ang kainit dili gid magdugay kay wala magikan sa gugma nga tunay!   Gahandum gihapon sa gugmang ginbilin, nga di gid malimtan sa dakung kangilin:	Katulad sang duta nga imo ginmat-an nga tubtub kon san-o imo gid balikan.   Gani nga ang tao kong magpanakayon, nga siang may ginbilin didto sa baybayon; dapat nga tipigan kag di pag dula-on ang daan nga gugma sang tagipusuon   Inday nga maanyag akon pinalangga, sa imo nga mata pahiri ang luha... Kay ako mabalik Sa dili maglidan bisan wala's hangin ining akon dughan.
Adlaw sang Himaya
Adlaw sang himaya, Adlaw sang kalipay, Ang tanan masadya Sa tanan nga balay.   Mga kabubut-on Nagahinangpanay Sa hinulongkaging Sang mga lingganay.   Gahiniruphirup Kag gasamaya-ay Ang tao nga daku Kag tao nga diotay. Puno sing himaya, Si Toto, Si Inday, Samtang nagabagting Ang mga lingganay   Ang anak sang Diwa Nga wala sing angay, Natao sa handong Sang payag nga dyutay.	Kag ang Kataohan, Gasinadyahanay Samtang guinagaling Ang mga lingganay,   Sa tunga sang gab-i, Pukawon mo, Nanay, Mga kabataan Nga labing magamay   Agud sila tanan Makapangalipay Sa hinulongkaging Sang mga lingganay. Kabay nga mapat-ud Ang sinuay-suay Kabay nga mag untat Ang mga inaway.   Kag ang banwa Mahilidaitay Sa tunog kag banting Sang mga lingganay.